Maharashtra Weather: महाराष्ट्रात अखेर मान्सूनने जोरदार एन्ट्री घेतली असून, नैऋत्य मोसमी वारे दक्षिण कोकणात दाखल झाले आहेत. मान्सूनच्या आगमनामुळे सिंधुदुर्ग आणि रत्नागिरीसह कोकण किनारपट्टीवर पावसाच्या मध्यम ते जोरदार सरी कोसळत आहेत. यंदा मान्सून आपल्या वेळेच्या दोन दिवस आधीच दाखल झाल्याने बळीराजा सुखावला असून, भातशेतीच्या कामांना वेग आला आहे.
हवामान विभागाने राज्यातील २५ जिल्ह्यांना पावसाचा ‘यलो अलर्ट’ जारी केला आहे. यामध्ये पुणे, सातारा, नाशिक, रायगड, सोलापूर, कोल्हापूरसह विदर्भ आणि मराठवाड्यातील अनेक जिल्ह्यांचा समावेश आहे. पुढील चार ते पाच दिवस या जिल्ह्यांमध्ये विजांच्या कडकडाटासह मुसळधार पाऊस आणि ताशी ३० ते ४० किलोमीटर वेगाने वारे वाहण्याची शक्यता वर्तवण्यात आली आहे.
मात्र, संपूर्ण राज्यात मान्सूनचा जोर वाढण्यासाठी १५ जूनपर्यंतची प्रतीक्षा करावी लागणार आहे. हवामान तज्ज्ञांच्या मते, सध्या मोसमी वाऱ्यांचा वेग मंदावल्याने राज्यात व्यापक पावसासाठी काही काळ वाट पाहावी लागेल. १२ जूनपर्यंत विदर्भ, खान्देश आणि मराठवाड्यात कमाल तापमान उच्च राहण्याचा अंदाज असून, उष्णतेचा दाह कायम राहणार आहे.
कृषी विभागाने शेतकऱ्यांना सावधगिरीचा सल्ला दिला आहे. केवळ पावसाच्या प्राथमिक अंदाजावर विश्वास ठेवून पेरणीची घाई करू नका, असे आवाहन करण्यात आले आहे. तसेच, वादळी पावसाच्या वेळी विजांपासून बचावासाठी झाडाखाली किंवा वीज खांबांजवळ उभे राहणे टाळावे आणि सुरक्षित स्थळी आश्रय घ्यावा, असे आवाहन आपत्ती व्यवस्थापन विभागाकडून करण्यात आले आहे.
