मुंबई, ता. १४ : पुण्यात दोन वेगवेगळ्या घटनेत पोलिसांनी अल्पवयीन मुलींची छेड काढून विनयभंग केल्याच्या घटना ताज्या असतानाच, आता राज्य दहशतवादविरोधी विभागातील सहाय्यक पोलीस निरीक्षक विश्वास पाटील याने शिवाजी पार्क परिसरात कोल्ड्रिंक्समधून गुंगीचे औषध देऊन बलात्कार केला आहे. याबाबतचा आरोप एका महिलेने केला आहे.
याप्रकरणी पीडित महिलेने आझाद मैदान पोलिस ठाण्यात फिर्याद दिली आहे. त्यानुसार सहाय्यक पोलीस निरीक्षक विश्वास पाटील याच्यावर गुन्हा दाखल करण्यात आला आहे. सदर प्रकार हा ऑक्टोबर 2020 मध्ये घडला आहे.
पोलिसांनी दिलेल्या माहितीनुसार, सहाय्यक पोलीस निरीक्षक विश्वास पाटील हे सन २०१९ साली एटीएसमध्ये काम करत असताना गुंड रवी पुजारी प्रकरणात काम करत असताना त्यांची पिडीत महिलेची भेट झाली. त्यानंतर पाटील यांनी महिलेशी मैत्री वाढवली. त्याने तिला पोलिस खात्याकडून आणखी व्यवसाय देण्याचे आश्वासन दिले.
मैत्री वाढत गेल्यानंतर महिलेसमोर त्यांनी आपले प्रेम व्यक्त केले. तेव्हा पिडीत महिलेने नकार दिला. त्यावेळी पाटील काम करत असलेल्या मुंबई गुन्हे शाखेच्या खंडणी विरोधी सेलच्या निरीक्षकाकडे तिने याबाबत तक्रार केली. तक्रार केल्यानंतर तेथील वरिष्ठ पोलिस अधिकाऱ्यांकडे तक्रार करू नका, असे सांगण्यात आल्याची माहिती आझाद मैदान पोलिस ठाण्यातील एका अधिकाऱ्याने सांगितले.
दरम्यान, ऑक्टोबर २०२० साली पाटीलने पीडित महिलेला एका कामासाठी फोन केला आणि तिला शिवाजी पार्क परिसरात भेटण्यास सांगितले. दादर येथील हॉटेलमध्ये त्यांची भेट झाली. मात्र, रेस्टॉरंटमध्ये गर्दी वाढत असल्याने त्यांना बोलता येत नव्हते. त्यावेळी त्याने तिला शिवाजी पार्क येथील जवळच्या फ्लॅटमध्ये येण्यास सांगितले. त्यानंतर त्याने तिला थंड पेयातून गुंगीचे औषध दिले आणि तिच्यावर बलात्कार केल्याचे पिडीतेने आपल्या तक्रारीत म्हटले आहे.
‘ते’ फोटो व्हायरल करण्याची धमकी देऊन वारंवार अत्याचार
आरोपीने पीडितेच्या कुटुंबाला मारण्याची धमकी देत तिचे आक्षेपार्ह फोटो सोशल मीडियावर व्हायरल करेल अशी धमकी दिली. या धमकीचा गैरफायदा घेऊन आरोपी सहाय्यक पोलीस निरीक्षक पाटीलने पीडित महिलेवर वेळोवेळी बलात्कार केला, असा आरोप महिलेने केला आहे. याप्रकरणी पिडीत महिलेने आझाद मैदान पोलिस ठाण्यात फिर्याद दिली आहे. त्यानुसार मैदान पोलिसांनी सहाय्यक पोलीस निरीक्षक विश्वास पाटील याच्यावर गुन्हा दाखल करून तपास करत आहेत.
