अहमदनगर: एखाद्याला रात्रीच्या वेळी लिफ्ट देणं किती महागात ठरू शकते, याचा अनुभव अहमदनगरच्या एका वाहन चालकाला आला आहे. गाडीची लिफ्ट दिल्यानंतर मागे बसलेल्या माणसाने चालकाच्या डोक्यात जबर वार करून जखमी केले. त्यानंतर या चोरांनी गाडी, मोबाईल आणि रोख रक्कम घेऊन पळ काढला.
अहमदनगर जिल्ह्यातील पिंपळगाव कौडातील सचिन पठारे आपल्या चारचाकी वाहनातून सुपा येथे त्यांच्या कंपनीच्या मॅनेजरला घरी सोडून परतत असताना रात्रीच्या वेळी दोन अनोळखी व्यक्तींनी त्यांना लिफ्ट मागितली. या प्रवाशांना लिफ्ट दिली असता मागच्या सीटवर बसलेल्या या दोन अनोळखी व्यक्तीपैकी एकाने हातोड्याने पठारे यांच्या डोक्यावर वार करून जबरी जखमी केले. त्यांची गाडी, मोबाईल आणि रोख रक्कम असा एकूण पाच लाख रुपयांचा मुद्देमाल घेऊन पळ काढला.
या प्रकरणी सचिन पठारे यांनी सुपा पोलीस ठाण्यामध्ये गुन्हा दाखल केला. घटनेचे गांभीर्य लक्षात घेऊन अहमदनगरचे पोलीस अधीक्षक राकेश ओला यांनी स्थानिक गुन्हे शाखेच्या पथकाला समांतर तपास करण्याचे आदेश दिले. स्थानिक गुन्हे शाखेचे प्रमुख पोलीस निरीक्षक दिनेश आहेर यांनी एक टीम बनून आरोपींचा शोध सुरू केला.
दरम्यान स्थानिक गुन्हे शाखेच्या पथकाने सीसीटीव्ही फुटेजच्या आधारे तांत्रिक विश्लेषण करून संबंधित गाडी हे कोपरगाव दिशेने गेली असल्याचे निष्पन्न केले. त्यातच गुप्त बातमीदारमार्फत संबंधित आरोपी चोरीचा मुद्देमाल घेऊन कोपरगाव- सिन्नरच्या रस्त्यावरील एका पेट्रोल पंपावर थांबले असल्याची माहिती स्थानिक गुन्हे शाखेच्या पथकाला मिळाली.
मिळालेल्या माहितीच्या आधारे आरोपी शिवम मातादिन गौतम आणि दुर्जन अनारसिंग गौतमला स्थानिक गुन्हे शाखेच्या पथकाने ताब्यात घेतले त्यांची अंगझडती घेतली असता, रोख रक्कम ,मोबाईल आणि संबंधित कार तसेच गुन्ह्यात वापरलेला हातोडा पोलिसांनी हस्तगत केला. पुढील तपासासाठी या आरोपींना सुपा पोलिसांच्या ताब्यात देण्यात आले आहे.
