सातारा: शिक्षक बदली प्रक्रियेतील गैरप्रकारांविरोधात सातारा जिल्हा परिषदेने कठोर पाऊल उचलले आहे. बनावट दिव्यांग प्रमाणपत्रांचा वापर करून लाभ मिळवल्याच्या आरोपावरून आता दोन शिक्षकांना सेवेतून निलंबित करण्यात आले आहे. दरम्यान, समोर आलेल्या माहितीनुसार अनेक शिक्षकांनी दिव्यांग प्रमाणपत्राचा गैरवापर करून बदली आणि इतर लाभासाठी अर्ज केल्याच्या तक्रारी प्रशासनाकडे आल्या होत्या. या तक्रारींची गंभीर दखल घेऊन जिल्हा परिषदेने 581 दिव्यांग शिक्षकांची पुन्हा वैद्यकीय तपासणी करण्याचे आदेश दिले होते. या तपासणीत दोन शिक्षकांनी शासनाची फसवणूक केल्याचे उघड झाले. या गंभीर फसवणुकीप्रकरणी प्रशासनाने संबंधित शिक्षकांवर गुन्हा दाखल करण्याचे आदेशही दिले आहेत. या कारवाईमुळे एकूण निलंबित शिक्षकांची संख्या आता 3 झाली आहे.
प्रशासनाने घेतली गंभीर दखल
- सुरेखा प्रभाकर वायदंडे: कराड तालुक्यातील आगाशिवनगर येथील शिक्षिका सुरेखा वायदंडे यांनी बदलीसाठी 48 टक्के दिव्यांगत्वाचे प्रमाणपत्र सादर केले होते. मात्र, त्यांची पुन्हा तपासणी केली असता, त्यांच्या दिव्यांगत्वाचे प्रमाण केवळ 16 टक्के आढळले. यामुळे मुख्य कार्यकारी अधिकाऱ्यांनी त्यांना सेवेतून निलंबित करून त्यांच्यावर गुन्हा दाखल करण्याचे आदेश दिले आहेत.
- श्रीकांत विष्णू दोरगे: माण तालुक्यातील काळेवाडी येथील उपशिक्षक श्रीकांत दोरगे यांनी त्यांच्या मुलाचे 42 टक्के दिव्यांगत्वाचे प्रमाणपत्र सादर करून लाभ मिळवण्याचा प्रयत्न केला होता. या प्रमाणपत्राची फेरतपासणी केली असता, मुलाचे कर्णबधिरत्वाचे मूल्यमापन शून्य टक्के आढळले. त्यामुळे फसवणुकीच्या आरोपाखाली दोरगे यांनाही निलंबित करण्यात आले आहे.
या दोन्ही प्रकरणांमुळे जिल्हा परिषदेने बनावट प्रमाणपत्रांबाबत कठोर भूमिका घेतली असल्याचे स्पष्ट झाले आहे. प्रशासनाच्या या कारवाईमुळे भविष्यात अशा प्रकारच्या गैरप्रकारांना आळा बसेल अशी अपेक्षा आहे.
