पिंपरी: पिंपरी-चिंचवड महापालिका निवडणुकीसाठी प्रशासनाने चार सदस्यांच्या 32 प्रभाग रचनेचे नकाशे तयार केले आहेत. गेल्या काही दिवसांपासून प्रभाग रचनेच्या कामाला वेग आला होता. महापालिका आयुक्त तथा प्रशासक शेखर सिंह यांच्या अध्यक्षतेखालील निवडणूक विभागाचे सहाय्यक आयुक्त अविनाश शिंदे यांच्या पथकाने हे नकाशे तयार केले आहेत. या रचनेत तळवडे-चिखली भागातून सुरुवात करून सांगवी-दापोडीपर्यंत उतरत्या क्रमाने प्रभागांची मांडणी करण्यात आली आहे. हे नकाशे आज, मंगळवार (दि. 5) रोजी मुंबई येथील नगर विकास विभागाकडे मान्यतेसाठी सादर केले जाणार आहेत. नगर विकास विभागाच्या मंजुरीनंतर ही प्रभाग रचना राज्य निवडणूक आयोगाकडे पाठवली जाईल. सर्व प्रक्रिया पूर्ण झाल्यानंतर प्रभाग रचनेचा अंतिम मसुदा 22 ऑगस्टला प्रसिद्ध केला जाईल.
प्रशासक शेखर सिंह यांनी गेल्या शनिवार आणि रविवारी संबंधित अधिकाऱ्यांसोबत बैठका घेऊन नकाशांमधील त्रुटी तपासल्या. तसेच, प्रत्यक्ष पाहणी केली आहे की नाही याचीही खात्री केली. यानंतर त्यांच्या स्वाक्षरीने हे नकाशे नगर विकास विभागाकडे पाठवले जात आहेत.
पुढील प्रक्रिया
निवडणूक आयोगाकडून मान्यता मिळाल्यानंतर, प्रारूप प्रभाग रचना 22 ऑगस्टला जाहीर केली जाईल. त्यानंतर नागरिकांना त्यावर हरकती आणि सूचना मांडण्यासाठी 28 ऑगस्टपर्यंतचा वेळ दिला जाईल. 29 ऑगस्ट ते 8 सप्टेंबर या कालावधीत या सूचनांवर सुनावणी होईल. या सर्व घडामोडींमुळे शहरातील राजकीय वर्तुळात प्रचंड उत्सुकता आहे, कारण सर्वच पक्ष निवडणुकीच्या तयारीला लागले आहेत.
