लोणी काळभोर, ता. 27 : ‘वाडा’, ‘गढी’ आणि ‘भुईकोट किल्ला’ या संकल्पनांमधील गोंधळ दूर करत ‘गढी’चे शास्त्रशुद्ध आणि देखणे दर्शन घडवणारे “गढी – महाराष्ट्रातील दुर्लक्षित वास्तूवैभव” हे आगळेवेगळे कॉफी टेबल बुक लवकरच वाचकांच्या भेटीला येत आहे. महाराष्ट्र दिनाच्या औचित्याने प्रकाशित होणाऱ्या या पुस्तकामुळे इतिहास आणि वास्तूवैभव रसिकांमध्ये उत्सुकता निर्माण झाली आहे.
फुरसुंगी (ता. हवेली, जि. पुणे) येथील तरुण गिर्यारोहक प्रवीण हरपळे यांनी तब्बल वीस वर्षांच्या भटकंतीतून हा ग्रंथ साकारला आहे. उच्च शिक्षित असलेले हरपळे हे सीरम इन्स्टिट्यूट ऑफ इंडिया येथे कार्यरत असून, इतिहासावरील त्यांचा अभ्यास या पुस्तकातून प्रकर्षाने दिसून येतो.
या आकर्षक कॉफी टेबल बुकमध्ये महाराष्ट्रातील तब्बल १०३ गढींचा समावेश असून, ३१६ रंगीत पानांतून (कलर पेजेस) गढ्यांचे दुर्मीळ आणि देखणे दर्शन घडते. क्राउन साईजमधील या पुस्तकात अनेक अल्पपरिचित पण ऐतिहासिकदृष्ट्या महत्त्वाच्या गढ्यांचा समावेश करण्यात आला आहे.
या ग्रंथाचे खास वैशिष्ट्य म्हणजे प्रत्येक गढीपर्यंत पोहोचण्यासाठी क्यूआर (QR) कोडची सुविधा देण्यात आली आहे. त्यामुळे अभ्यासक आणि पर्यटकांना संबंधित ठिकाणी सहज पोहोचणे शक्य होणार आहे. या पुस्तकाची मूळ किंमत ₹७५०/- असून, प्रकाशनाच्या दिवशी विशेष सवलतीत ₹५००/- मध्ये उपलब्ध होणार असल्याची माहिती लेखकांनी दिली आहे.
दरम्यान, या ग्रंथाचा भव्य प्रकाशन सोहळा २ मे रोजी सायंकाळी ५ वाजता विठ्ठलराव तुपे सभागृह, हडपसर येथे आयोजित करण्यात आला आहे. याचवेळी ४०० हून अधिक जुने वाडे आणि गढ्यांचे छायाचित्र प्रदर्शनही भरवण्यात येणार आहे. इतिहासप्रेमी, अभ्यासक आणि नागरिकांनी या सोहळ्यास उपस्थित राहावे, असे आवाहन आयोजकांकडून करण्यात आले आहे.
