Manjari Arrested News लोणी काळभोर, ता. २३ : पुणे शहर, पिंपरी-चिंचवड आणि पुणे जिल्ह्यातून दोन वर्षांसाठी हद्दपार करण्यात आलेला सराईत आरोपी पुन्हा पुण्यातच मुक्तपणे फिरताना गुन्हे शाखेच्या पथकाने रंगेहाथ पकडल्याने खळबळ उडाली आहे. विशेष म्हणजे, मांजरी गावातील अक्षय रेस्टॉरंट बारसमोर सार्वजनिक रस्त्याजवळ पोलिसांना पाहताच आरोपीने घटनास्थळावरून पळून जाण्याचा प्रयत्न केला. मात्र गुन्हे शाखेच्या सतर्क पथकाने त्याचा पाठलाग करून काही क्षणांतच त्याला २२ मे रोजी रात्री जेरबंद केले. या कारवाईमुळे हद्दपार आरोपींवर पोलिसांची करडी नजर असल्याचे पुन्हा स्पष्ट झाले आहे. Manjari Arrested News
दत्ता गणेश गायकवाड (वय ४४, रा. गणपती मंदिर चौक, केशवनगर, मुंढवा) असे पकडण्यात आलेल्या आरोपीचे नाव आहे. पुणे शहर गुन्हे शाखेच्या युनिट ६ कडून वरिष्ठांच्या आदेशानुसार “कॉम्बिंग आणि राऊंड अप ऑपरेशन” राबवण्यात येत असून, रेकॉर्डवरील गुन्हेगारांची पडताळणी आणि हालचालींवर लक्ष ठेवण्यात येत आहे. याच मोहिमेदरम्यान २२ मे रोजी रात्री गुन्हे शाखेचे पोलीस शिपाई गणेश विश्वनाथ माने, पोलीस हवालदार देशमुख, सकटे आणि श्रीकांत पांडुळे हे मांजरी पोलीस ठाण्याच्या हद्दीत गस्त घालत होते.
दरम्यान, पोलिसांना गुप्त बातमीदारामार्फत माहिती मिळाली की, “दत्ता गणेश गायकवाड” हा हद्दपार आरोपी मांजरी गावातील अक्षय रेस्टॉरंट बारसमोर सार्वजनिक रस्त्यावर संशयास्पदरीत्या फिरत आहे. ही माहिती मिळताच पोलिसांनी तात्काळ सापळा रचत घटनास्थळी धाव घेतली. Manjari Arrested News
पोलिसांचे वाहन आणि पथक जवळ येताना पाहताच संबंधित आरोपी घाबरला आणि घाईघाईने तेथून पसार होण्याचा प्रयत्न करू लागला. मात्र पोलिसांनी तत्परता दाखवत त्याचा पाठलाग करून २०.४५ वाजण्याच्या सुमारास त्याला पकडले. चौकशीत त्याने आपले नाव दत्ता गणेश गायकवाड असे सांगितले.
पुढील तपासात धक्कादायक बाब समोर आली. पुणे शहर पोलीस उपआयुक्त परिमंडळ-५ यांनी संबंधित आरोपीला महाराष्ट्र पोलीस अधिनियम १९५१ च्या कलम ५६(१)(अ)(ब) अंतर्गत पुणे शहर, पिंपरी-चिंचवड पोलीस आयुक्तालय आणि पुणे जिल्ह्यातून तब्बल दोन वर्षांसाठी हद्दपार केले होते. तरीही आरोपी कोणतीही न्यायालयीन किंवा पोलिसांची पूर्वपरवानगी न घेता पुण्यात वावरत असल्याचे स्पष्ट झाले. Manjari Arrested News
दरम्यान, पोलिसांनी आरोपीची चौकशी करून त्याची ई-साक्ष अॅपद्वारे नोंद केली असून, त्याला पुढील कारवाईसाठी ताब्यात घेण्यात आले आहे. आरोपीला अटक केल्याची माहिती त्याच्या कुटुंबीयांनाही देण्यात आली आहे. या प्रकरणी आरोपीविरोधात महाराष्ट्र पोलीस अधिनियम कलम १४२ अन्वये गुन्हा दाखल करण्यात आला आहे. गुन्हे शाखेचे पोलीस निरीक्षक सुदर्शन गायकवाड यांच्या मार्गदर्शनाखाली ही कारवाई करण्यात आली.
