सोलापूर: सोलापूर जिल्ह्यातील माढा तालुक्यात मोठ्या प्रमाणावर सुरू (Swaranjali Kala Kendra) असलेल्या वेश्या व्यवसायाचा टेंभुर्णी पोलिसांनी पर्दाफाश केला आहे. मोडनिंब येथील स्वरांजली कला केंद्रावर (Solapur News) टाकलेल्या छाप्यात पोलिसांनी सहा आरोपींना अटक केली असून तब्बल 25 महिलांची सुटका (Madha News) करण्यात यश मिळवले आहे. ही कारवाई या परिसरातील आतापर्यंतची सर्वात मोठी कारवाई मानली जात आहे. (Latest Marathi News)
पोलिसांकडून मिळालेल्या माहितीनुसार, मोडनिंब येथील स्वरांजली कला केंद्राच्या आडून वेश्या व्यवसाय चालवला जात असल्याची गोपनीय माहिती टेंभुर्णी पोलीस ठाण्याचे प्रभारी अधिकारी राहुल आत्राम यांना मिळाली होती. या माहितीच्या आधारे पोलिसांनी नियोजनबद्ध सापळा रचून 15 मार्च रोजी मध्यरात्री छापा टाकला. छाप्यात कला केंद्राचे मालक, व्यवस्थापक तसेच इतर काही जण महिलांकडून जबरदस्तीने वेश्या व्यवसाय करून घेत असल्याचे उघड झाले.
या कारवाईदरम्यान पोलिसांना तेथे 25 महिला आढळून आल्या. यामध्ये परराज्यातील महिलांचाही समावेश असल्याची माहिती समोर आली आहे. आर्थिक फायद्यासाठी संगनमताने हा व्यवसाय चालवला जात असल्याचे तपासात निष्पन्न झाले. पोलिसांनी सर्व महिलांची सुटका करून त्यांना संरक्षणात घेतले आहे.
या प्रकरणी स्वरांजली कला केंद्राचे चालक जगन्नाथ तुकाराम घाडगे, व्यवस्थापक विशाल पवार, बाळासाहेब गिड्डे, छाया सुरवसे, रिक्षाचालक नितीन चव्हाण आणि स्वागत लॉजचा व्यवस्थापक सिद्धांत गायकवाड यांच्यासह एकूण सहा जणांना अटक करण्यात आली आहे. सर्व आरोपींविरुद्ध विविध कलमांनुसार गुन्हा दाखल करण्यात आला असून न्यायालयाने त्यांना दोन दिवसांची पोलीस कोठडी सुनावली आहे.
ही कारवाई पोलीस अधीक्षक अतुल कुलकर्णी, अप्पर पोलीस अधीक्षक प्रीतम यावलकर आणि सहाय्यक पोलीस अधीक्षक अंजना कृष्णाव्ही.एस यांच्या मार्गदर्शनाखाली करण्यात आली. टेंभुर्णी पोलिसांच्या पथकाने केलेल्या या कारवाईमुळे परिसरात सुरू असलेल्या अवैध व्यवसायावर मोठा आळा बसण्याची शक्यता व्यक्त केली जात आहे.
