शिरूर: अवैध गावठी पिस्तुल बाळगणाऱ्या आरोपींविरुद्ध शिरूर पोलिसांनी धडाकेबाज कारवाई करत तीन आरोपींना अटक केली असून, त्यांच्याकडून दोन गावठी बनावटीची पिस्तुले व सहा जिवंत काडतुसे जप्त करण्यात आली आहेत. तसेच एक फोर्ड फिगो कार आणि एक पल्सर मोटारसायकल असा एकूण सुमारे ३ लाख ४५ हजार ५०० रुपयांचा मुद्देमाल पोलिसांनी हस्तगत केला आहे.
पोलिसांनी दिलेल्या माहितीनुसार, शुक्रवारी (ता. १३) रात्री सुमारे ९ वाजण्याच्या सुमारास पोलिस हवालदार विशाल कोथळकर यांना माहिती मिळाली की, निमोणे (ता. शिरूर) येथील नागेश्वर विद्यालयासमोर पांढऱ्या रंगाच्या फोर्ड फिगो कारमध्ये काही इसम गावठी पिस्तुल व जिवंत काडतुसे बाळगून थांबले आहेत. त्यानुसार पोलिस निरीक्षक संदेश केंजळे यांच्या मार्गदर्शनाखाली पोलिस उपनिरीक्षक गोविंद खटिंग, हवालदार विशाल कोथळकर व पोलिस कर्मचारी सुशील सुरवसे यांनी तातडीने घटनास्थळी सापळा रचला.
पोलिसांनी संशयित कारची तपासणी केली असता, त्यामध्ये बसलेले समीर प्रकाश शेलार (वय २३) व संपत गणपत दुर्गे (वय ३५, दोघेही रा. निमोणे, ता. शिरूर) यांना ताब्यात घेण्यात आले.कारमध्ये तपासणी केली असता हँडब्रेकखाली एक गावठी बनावटीचे पिस्तुल व त्याच्या मॅगझिनमध्ये एक जिवंत काडतूस आढळून आले. याप्रकरणी शिरूर पोलीस ठाण्यात शस्त्र अधिनियम कायद्या अंतर्गत गुन्हा दाखल करण्यात आला असून, दोन्ही आरोपींना न्यायालयासमोर हजर केले असता सोमवार (ता. १६) पर्यंत पोलिस कोठडी सुनावण्यात आली आहे.
त्यानंतर दुसऱ्या दिवशी शनिवारी (ता. १४) सायंकाळी पेट्रोलिंग दरम्यान पोलिसांना गुप्त माहिती मिळाली की, सराईत गुन्हेगार नवनाथ साहेबराव गोरडे (वय ३८, रा. पोहेगाव खुर्द, ता. कोपरगाव, जि. अहिल्यानगर) हा दुचाकीवरून अवैध पिस्तुल घेऊन शिरूरकडे येत आहे. त्यानुसार पोलिसांनी अहिल्यानगर–पुणे महामार्गावर सापळा लावला. दरम्यान भरधाव वेगात येणारी मोटारसायकल खासगी वाहनाला धडकून पडल्याने मागे बसलेला इसम पळून जाण्याचा प्रयत्न करत असताना पोलिसांनी त्याला ताब्यात घेतले.
तपासणी केली असता त्याच्या कमरेला एक गावठी बनावटीचे पिस्तुल व मॅगझिनमध्ये पाच जिवंत काडतुसे आढळून आली. चौकशीत ही पिस्तुल त्याने मोटारसायकलवर मागे बसलेल्या सागर बनसोडे (रा. राहता, अहिल्यानगर) यांच्याकडून विकत घेतल्याचे समोर आले. या कारवाईत शिरूर पोलिसांनी दोन गावठी पिस्तुले, सहा जिवंत काडतुसे, एक फोर्ड फिगो कार व एक पल्सर मोटारसायकल असा मुद्देमाल जप्त केला असून तिन्ही आरोपींना अटक करण्यात आली आहे.
ही कारवाई पोलिस अधीक्षक संदीप सिंह गिल्ल, अपर पोलिस अधीक्षक रमेश चोपडे, उपविभागीय पोलिस अधिकारी प्रशांत ढोले व पोलिस निरीक्षक संदेश केंजळे यांच्या मार्गदर्शनाखाली पोलिस उपनिरीक्षक गोविंद खटिंग, शुभम चव्हाण, हवालदार विशाल कोथळकर तसेच पोलिस कर्मचारी नितेश थोरात, अक्षय कळमकर, सचिन भोई, सुशील सुरवसे, अजय पाटील, दादाराव नागरे, संदीप खेडकर, सागर बोराडे, विजय शिंदे, निखिल रावडे, रविंद्र काळे, निरज पिसाळ आदींच्या पथकाने केली.
