पुणे : पुण्यातील केतन अग्रवाल हत्या प्रकरणात महत्वाची माहिती समोर आली आहे.पुणे ग्रामीण पोलिसांनी मोठी कारवाई करत तिसऱ्या आरोपीला बेड्या ठोकल्या आहेत. या प्रकरणातील मुख्य आरोपी चेतन चौधरी याचा वर्गमित्र रितेश हिंगे याला पोलिसांनी अटक केली आहे.
मिळालेल्या माहितीनुसार, रितेश हा मूळचा बीड येथील असून सध्या बालेवाडीत एका खासगी कंपनीत नोकरी करतो. या गुन्ह्याची पूर्वकल्पना असूनही पोलिसांना माहिती न दिल्याचा आणि पुरावे नष्ट केल्याचा त्याच्यावर आरोप आहे. न्यायालयाने त्याला 12 सप्टेंबरपर्यंत पोलीस कोठडी सुनावली आहे.
घटनेची पार्श्वभूमी आणि कट
26 वर्षीय केतन अग्रवाल हा रिअल इस्टेट क्षेत्रातील उद्योजक होता. त्याचा विवाह 20 वर्षीय सिया गोयल हिच्याशी निश्चित झाला होता. मात्र, सियाचे तिचा वर्गमित्र चेतन चौधरी याच्यावर प्रेम होते. या प्रेमसंबंधात केतन अडथळा ठरत असल्याने सिया आणि चेतनने त्याच्या हत्येचा कट रचला. 18 जून 2026 रोजी वाढदिवसाचे औचित्य साधून सियाने केतनला लोहगड किल्ल्यावर ट्रेकिंगच्या बहाण्याने नेले. तेथे चेतन आणि सियाने मिळून केतनला दरीत ढकलून दिले. सुरुवातीला अपघाताचा बनाव रचण्यात आला होता, परंतु सीसीटीव्ही फुटेज आणि सखोल तपासाअंती हत्येचा उलगडा झाला.
व्हॉट्सॲप चॅट ठरले महत्त्वाचा पुरावा
तपासादरम्यान पोलिसांना रितेश हिंगेच्या सहभागाचा सुगावा लागला. चेतन आणि सियाने रितेशला देखील 18 जून रोजी लोहगडवर येण्यास सांगितले होते, परंतु त्याने जाणे टाळले. हत्येच्या कटाबाबत रितेशला पूर्ण कल्पना होती. चेतनसोबत झालेले व्हॉट्सॲप संभाषण रितेशने मोबाईलमधून डिलीट केले होते. पोलिसांनी हे चॅट रिकव्हर केल्यानंतर कटातील त्याचा सहभाग उघडकीस आला.
सध्या मुख्य आरोपी सिया गोयल आणि चेतन चौधरी न्यायालयीन कोठडीत येरवडा मध्यवर्ती कारागृहात आहेत. हे प्रकरण जलदगती न्यायालयात चालवले जात असून, रितेशच्या अटकेमुळे या गुन्ह्यातील आणखी काही धक्कादायक माहिती समोर येण्याची शक्यता वर्तवली जात आहे.
