सातारा: रक्षाबंधनानिमित्त माहेरी जाण्याची इच्छा पूर्ण होत नसल्याने एका 26 वर्षीय विवाहित महिलेने आपले अपहरण झाल्याचे भासवले. सातारा जिल्ह्यात घडलेल्या एका विचित्र घटनेने पोलिसांसमोरही वेगळेच आव्हान उभे केले होते. मात्र, पोलिसांनी वेगाने तपास करत अवघ्या 4 तासांत या कथित अपहरणामागील सत्य शोधून काढले.
माण तालुक्यातील सुरूपखानवाडी गावातील निकिता गलांडे हिच्याबाबत हा प्रकार घडला. सासरी असताना तिला माहेरी जायचे होते. मात्र, त्यासाठी सासरच्या मंडळींकडून परवानगी मिळत नसल्याने ती नाराज होती. त्यानंतर तिने वेगळाच मार्ग निवडत स्वतःच्या अपहरणाचा कट रचल्याचे तपासातून समोर आले आहे.
निकिता आणि तिचा पती शेतात असताना अचानक काळ्या रंगाचे वाहन तेथे आले. त्यातून आलेल्या काही व्यक्तींनी निकिताला जबरदस्तीने सोबत नेल्याचे तिच्या पतीने पोलिसांना सांगितले. माहिती मिळताच पोलिसांनी या घटनेची गांभीर्याने दखल घेत शोधमोहीम सुरू केली.
तपासादरम्यान पोलिसांनी घटनाक्रमातील विविध बाबी पडताळून पाहिल्या. काही तासांच्या तपासानंतर पोलिसांना या कथित अपहरणाच्या घटनेबाबत संशय निर्माण झाला. त्यानंतर केलेल्या चौकशीत हा प्रकार प्रत्यक्षात बनावट असल्याचे समोर आले.
पोलिसांनी निकिताकडे चौकशी केली असता तिने माहेरी जाण्यासाठी हा प्रकार केल्याची कबुली दिल्याचे सांगण्यात आले. या संपूर्ण योजनेत तिच्या चुलत दिरानेही मदत केल्याचे तपासात निष्पन्न झाले आहे. दरम्यान, या घटनेमागील नेमक्या कारणांसह संबंधित व्यक्तींची भूमिका तपासण्यासाठी पोलिसांकडून पुढील चौकशी सुरू आहे.
