पुणे: पुणे शहरातील टोळीयुद्धाच्या पार्श्वभूमीवर पोलिसांनी आणखी एक कठोर कारवाई केली आहे. गायकवाड टोळीशी संबंधित असल्याचे सांगितल्या जाणाऱ्या सूरज ठोंबरेवर महाराष्ट्र संघटित गुन्हेगारी नियंत्रण कायदा म्हणजेच मकोका अंतर्गत कारवाई करण्यात आली आहे. कृष्णा आंदेकरवर हल्ला करण्याच्या कथित कटाशी ठोंबरेचा संबंध असल्याचा पोलिसांचा आरोप आहे.
काही दिवसांपूर्वी कृष्णा आंदेकर आणि त्याच्या साथीदारांना न्यायालयात हजर केल्यानंतर त्यांच्यावर हल्ला करण्याचा प्रयत्न झाल्याची घटना घडली होती. मात्र, पोलिसांनी वेळीच हस्तक्षेप केल्याने हा प्रयत्न फसला. त्यानंतर आंदेकरला कारागृहात नेत असलेल्या वाहनाचा पाठलाग करून पुन्हा हल्ला करण्याचा प्रयत्न झाल्याची माहिती समोर आली होती.
या प्रकरणाचा तपास करताना सूरज ठोंबरेचे नाव समोर आल्याचे पोलिसांकडून सांगण्यात आले. ठोंबरे हा सोमनाथ गायकवाडचा जवळचा साथीदार असल्याची माहिती आहे. सोमनाथ गायकवाड सध्या तुरुंगात असल्याने टोळीची सूत्रे ठोंबरे हाताळत असल्याचा पोलिसांचा दावा आहे. आंदेकरला न्यायालयातून नेताना हल्ल्याची योजना ठोंबरेने आखल्याचा आरोप तपास यंत्रणेकडून करण्यात आला आहे. भारती विद्यापीठ पोलिसांनी ठोंबरेविरोधात पोलीस आयुक्त अमितेशकुमार यांनी मकोका कारवाईचे आदेश दिले होते.
ठोंबरेविरोधात यापूर्वी खुनाचा प्रयत्न, गंभीर दुखापत, धमकी, बेकायदा पिस्तूल बाळगणे आणि दहशत निर्माण करणे यांसारखे गंभीर गुन्हे दाखल असल्याची माहिती आहे.
दरम्यान, विश्रांतवाडी आणि येरवडा परिसरात गुन्हेगारी कारवायांसाठी चर्चेत असलेल्या शोएब कुरेशीवरही मकोका अंतर्गत कारवाई करण्यात आली आहे. काही दिवसांपूर्वी एका तरुणावर हल्ला केल्याप्रकरणी कुरेशीविरोधात कारवाई झाली असून, त्याच्यासोबत असलेल्या एका अल्पवयीन मुलाला पोलिसांनी ताब्यात घेतले आहे. पुण्यात संघटित गुन्हेगारीला आळा घालण्यासाठी पोलिसांकडून सुरू असलेल्या कारवाईत या दोन्ही प्रकरणांना महत्त्व आले आहे.
