पुणे : भारतीय हवामान विभागाने आज 25 सप्टेंबर रोजी देशभरातील 17 राज्यांमध्ये जोरदार पावसाचा हाय अलर्ट जारी केला आहे. गेल्या काही दिवसांपासून थांबलेला मान्सून पुन्हा एकदा सक्रिय झाल्यामुळे ही परिस्थिती निर्माण झाली आहे. या हवामान बदलाच्या पार्श्वभूमीवर शेतकरी आणि मच्छिमारांना विशेष काळजी घेण्याच्या सूचना देण्यात आल्या आहेत. या कालावधीत सुमारे 85 किमी प्रति तास वेगाने वादळी वारे वाहण्याची शक्यता हवामान खात्याने वर्तवली आहे.
आयएमडीच्या अंदाजानुसार उत्तर प्रदेश, बिहार, दिल्ली, राजस्थान, हरियाणा, उत्तराखंड, पंजाब, हिमाचल प्रदेश, जम्मू-काश्मीर, ओडिशा, आंध्र प्रदेश, तेलंगणा, पश्चिम बंगाल, झारखंड, छत्तीसगड आणि मध्य प्रदेश या 17 राज्यांमध्ये मुसळधार पाऊस पडू शकतो.
विशेषतः ओडिशा, पश्चिम बंगाल आणि आंध्र प्रदेश या किनारपट्टीच्या राज्यांना या वादळाचा मोठा फटका बसण्याची शक्यता आहे. त्यामुळे तेथील नागरिकांना सुरक्षित ठिकाणी हलवण्याचे काम वेगाने सुरू आहे. तसेच डोंगराळ भागात दरडी कोसळण्याचा (भूस्खलन) धोका असल्याने सतर्कतेचा इशारा देण्यात आला आहे.
महाराष्ट्रात ऑगस्टचा संपूर्ण महिना आणि सप्टेंबरच्या पहिल्या दोन आठवड्यात पावसाने ओढ दिली होती. यामुळे राज्यात दुष्काळाचे सावट निर्माण झाले होते. मात्र, गेल्या 2 ते 3 दिवसांपासून राज्यातील विविध भागांत पुन्हा पावसाचे आगमन झाल्याने बळीराजाला मोठा दिलासा मिळाला आहे.
येत्या 24 तासांत विदर्भ आणि मराठवाड्यात पावसाचा जोर वाढण्याचा अंदाज आहे. खबरदारीचा उपाय म्हणून यवतमाळ, वाशीम, बुलढाणा, अकोला, चंद्रपूर, नागपूर, भंडारा आणि गोंदिया या जिल्ह्यांना पावसाचा ‘यलो अलर्ट’ देण्यात आला आहे.
