सातारा: शाळेत मुले सुरक्षित राहतील या विश्वासाने (Satara) पालक आपल्या पाल्यांना पाठवतात, त्याच शाळेत एका नराधम केअरटेकरने अत्याचार केल्याचे समोर आले आहे. साताऱ्यातील एका नामांकित इंग्रजी माध्यमाच्या शाळेत तब्बल 24 चिमुरड्यांचे लैंगिक शोषण आणि मानसिक छळ झाल्याची धक्कादायक घटना उघडकीस आली आहे. या प्रकरणी पोलिसांनी आरोपीला अटक केली आहे.
समोर आलेल्या माहितीनुसार, आरोपी केअरटेकरने केवळ तीन मुलांवर अत्याचार केल्याचे सुरुवातीला वाटले होते, मात्र सखोल चौकशीत ही संख्या 24 वर पोहोचली. 25 जानेवारी ते 7 मार्च 2026 या कालावधीत हा नराधम मुलांना मारहाण करणे, त्यांचे डोके आपटणे आणि हात पिरगळून त्यांना धमकावत होता. धक्कादायक म्हणजे, मुलांनी घडला प्रकार कोणाला सांगू नये म्हणून त्यांना जीवे मारण्याची भीती घालून त्यांच्याकडून पैसेही उकळले जात होते.
काही जणांनी धाडस दाखवत घडला प्रकार सांगितला असता संपूर्ण प्रकार समोर आला आहे. याप्रकरणी गुन्हा दाखल करण्यात आला असून आरोपीला बेड्या ठोकण्यात आल्या, दरम्यान, न्यायालयात आरोपीला हजर केले असता त्याला अटी व शर्तीवर जामीन मंजूर झाला असल्याची माहिती समोर आली आहे.
