पंढरपूर: पंढरपूर शहरात एक अत्यंत अंगावर काटा आणणारी घटना समोर आली आहे. मंगळवारी रात्री एका 24 वर्षीय रिक्षाचालकाचा रेल्वेच्या धडकेत मृत्यू झाला, मात्र त्यानंतर घडलेल्या प्रकारामुळे संपूर्ण शहरात खळबळ उडाली आहे. रोहित मधुकर कोरे असे मृत तरुणाचे नाव आहे.
मंगळवारी रात्री 12 :15 च्या सुमारास पंढरपूरमधील टेंभुर्णी रेल्वे गेटजवळ एका तरुणाचा रेल्वेच्या धडकेत मृत्यू झाल्याची माहिती रेल्वे उपप्रबंधकांनी पोलिसांना दिली. पोलिसांनी घटनास्थळी पोहोचून तपास सुरू केला असतानाच, शहरातील एका घराच्या दरवाजाला मानवी पायाचा तुकडा टांगलेला आढळला. धक्कादायक बाब म्हणजे, हा पाय रेल्वे अपघातात मृत्यू झालेल्या रोहित कोरे याचाच असल्याचे निष्पन्न झाले. अपघात झाल्यानंतर पाय मावशीच्या घराच्या दरवाजापर्यंत कसा पोहोचला किंवा कोणी तिथे टांगला, या गूढ प्रश्नाने पोलिसांनाही चक्रावून सोडले आहे.
या प्रकारानंतर रोहितच्या नातेवाइकांनी संताप व्यक्त केला असून, हा अपघात नसून घातपात असल्याचा आरोप केला आहे. “रोहितचा काही जणांशी वाद झाला होता, त्यातूनच त्याची हत्या करून मृतदेह रेल्वे रुळावर फेकून पुरावा नष्ट करण्याचा प्रयत्न झाला आहे,” असा दावा कुटुंबीयांनी केला आहे. सध्या पंढरपूर शहर पोलीस या प्रकरणाचा सखोल तपास करत आहेत.
