पुणे : दिवाळीच्या खरेदीसाठी पुण्यातील मध्यवर्ती बाजारपेठांमध्ये होणारी गर्दी लक्षात घेऊन शहर वाहतूक पोलिसांनी मालवाहतुकीबाबत महत्त्वाचे निर्बंध लागू केले आहेत. लक्ष्मी रस्ता, तुळशीबाग, मंडईसह प्रमुख व्यापारी भागांमध्ये हलक्या मालवाहू वाहनांतून मालाची ने-आण आणि चढ-उतार करण्यासाठी ठरावीक वेळ निश्चित करण्यात आली आहे. त्यानुसार, २६ ऑक्टोबर ते १२ नोव्हेंबर २०२६ या कालावधीत रात्री ११ ते सकाळी ९ वाजेपर्यंतच मालाची चढ-उतार करता येणार आहे.
दिवाळीच्या काळात कपडे, दागिने, मिठाई, सजावटीचे साहित्य आणि इतर वस्तूंच्या खरेदीसाठी पुण्यातील बाजारपेठांमध्ये नागरिकांची मोठी गर्दी होते. या काळात दुकानांमध्ये माल पोहोचवणाऱ्या वाहनांची वर्दळ वाढल्याने वाहतूक कोंडी होण्याची शक्यता असते. ही परिस्थिती टाळण्यासाठी आणि पादचाऱ्यांची सुरक्षितता राखण्यासाठी वाहतूक विभागाने हा निर्णय घेतला आहे.
वाहतूक पोलिसांनी जारी केलेल्या आदेशानुसार लक्ष्मी रस्ता, तुळशीबाग, मंडई, रविवार पेठ, शुक्रवार पेठ, भोरी आळी, गणेश पेठ, तापकीर गल्ली, कुमठेकर रस्ता, केळकर रस्ता आणि बाजीराव रस्ता या प्रमुख व्यापारी भागांमध्ये मालवाहतुकीसाठी वेळेचे निर्बंध लागू असतील.
या भागांमध्ये दिवसा खरेदीसाठी नागरिकांची मोठी गर्दी होत असल्याने मालवाहू वाहनांमुळे रस्त्यांवरील वाहतूक विस्कळीत होऊ शकते. त्यामुळे व्यापाऱ्यांनी आणि दुकानदारांनी मालाची वाहतूक तसेच चढ-उताराचे नियोजन निर्धारित वेळेनुसार करणे आवश्यक आहे.
मालवाहू वाहनचालक, व्यापारी आणि दुकानदारांनी पोलिसांनी निश्चित केलेल्या वेळेचे पालन करावे, असे आवाहन वाहतूक विभागाने केले आहे. हे आदेश पुणे शहर वाहतूक शाखेचे पोलीस उपायुक्त डॉ. संदीप भाजीभाकरे यांनी जारी केले आहेत.
दिवाळीच्या खरेदीसाठी मध्यवर्ती पुण्यात जाणाऱ्या नागरिकांनीही संभाव्य गर्दी लक्षात घेऊन प्रवासाचे नियोजन करावे. तसेच, बाजारपेठांमध्ये मालाची ने-आण करणाऱ्या व्यापाऱ्यांनी नव्या निर्बंधांची दखल घेऊन वाहतूक कोंडी टाळण्यासाठी सहकार्य करावे.
