नवी मुंबई: नवी मुंबईचे पोलीस आयुक्त मिलिंद भारंबे (Navi Mumbai) यांनी शहर गुन्हेगारीमुक्त करण्यासाठी ‘झिरो टॉलरन्स’ मोहीम हाती घेतली असून, त्याचाच एक भाग म्हणून रबाळे परिसरात सोमवारी रात्री ‘कॉम्बिंग ऑपरेशन’द्वारे मोठी कारवाई करण्यात आली. रबाळे आणि घनसोलीच्या झोपडपट्टी परिसरात पोलिसांनी एकाच वेळी छापा टाकून ड्रग्ज तस्कर, अवैध शस्त्र बाळगणारे आणि सराईत गुन्हेगारांना पकडले आहे.
रबाळे पोलीस ठाण्याच्या हद्दीतील नोसिल नाका, अर्जुनवाडी, साईनाथवाडी आणि घनसोली या संवेदनशील भागात ही मोहीम राबवण्यात आली. या विशेष मोहिमेत मोठी कारवाई केली असून, यामध्ये दारुबंदी कायद्यांतर्गत 1, अमली पदार्थांचे सेवन करणाऱ्यांवर 5 आणि अमली पदार्थ बाळगणाऱ्यावर 1 गुन्हा दाखल केला आहे. या ऑपरेशन दरम्यान 22 सराईत गुन्हेगारांची कसून तपासणी करण्यात आली, तर एकूण 229 वाहने तपासली असून त्यापैकी 92 वाहनांवर दंडात्मक कारवाई करण्यात आली आहे. तसेच पोलिसांनी शहरातील 11 हॉटेल्स आणि लॉजेसची तपासणी केली असून 12 फरारी आरोपींचा शोध घेतला असता त्यापैकी 1 पाहिजे असलेला आरोपी मिळून आला आहे. याव्यतिरिक्त ज्वलनशील पदार्थांच्या निष्काळजीपणाबाबत (कलम 285) 4 केसेस आणि अवैध गुटखा विक्री करणाऱ्या 2 आरोपींवर 2 गुन्हे दाखल करण्यात आले आहेत.
परिमंडळ-1 मधील 7 पोलीस ठाण्यांतील सुमारे 180 हून अधिक पोलीस कर्मचाऱ्यांनी या कारवाईत सहभाग घेतला. या मोहिमेत एका आरोपीकडून देशी कट्टा आणि 2 जिवंत काडतुसे जप्त करण्यात आली आहेत. विशेष म्हणजे, याच आरोपीकडे ब्राऊन शुगरच्या 100 पुड्या सापडल्याने खळबळ उडाली आहे. दरम्यान, या कारवाईत एकूण 14 आरोपींविरुद्ध विविध गुन्हे दाखल करण्यात आले आहेत.
नवी मुंबईत वाढती अमली पदार्थांची विक्री (NDPS), अवैध दारू आणि गुटखा विक्री यांवर लगाम घालण्यासाठी ही कारवाई करण्यात आली आहे. एकाच वेळी एवढ्या मोठ्या फौजफाट्यासह कारवाई केल्यामुळे गुन्हेगारांचे धाबे दणाणले आहेत.
