हडपसर, ता. १७ : काळेपडळ पोलिसांनी गुप्त माहितीच्या आधारे महंमदवाडीतील तरवडेवस्ती परिसरातील ईनामदार ग्राऊंडवर छापा टाकत धारदार शस्त्रासह तिघांना १५ जूनळा रात्री सुमारे अकरा वाजण्याच्या सुमारास ताब्यात घेतले. यामध्ये एका १६ वर्षीय अल्पवयीन मुलाचाही समावेश असून, तिघांविरोधात भारतीय हत्यार कायदा आणि महाराष्ट्र पोलीस कायद्यानुसार गुन्हा दाखल करण्यात आला आहे.
सुमित सुभाष शिंदे (वय २४), वैभव अनिल पेठे (वय २०) या दोघांना अटक केली आहे. तर एका १६ वर्षाच्या मुलाला ताब्यात घेतले आहे. पोलिसांनी दिलेल्या माहितीनुसार, काळेपडळ पोलीस ठाण्यातील पोलीस अंमलदार विशाल नागनाथ थोरात आणि पोलीस अंमलदार बुधवारे हे १५ जूनच्या रात्री महंमदवाडी पोलीस चौकी हद्दीत बीट मार्शल म्हणून गस्त घालत होते. बातमीदारामार्फत ईनामदार ग्राऊंड परिसरात काही संशयित इसम हत्यारे घेऊन एखादा गंभीर गुन्हा करण्याच्या उद्देशाने थांबले असल्याची माहिती मिळाली.
ही माहिती मिळताच रात्रगस्त अधिकारी सहाय्यक पोलीस निरीक्षक अमित शेटे यांना कळविण्यात आली. त्यानंतर पोलीस पथकाने पंचांच्या उपस्थितीत सापळा रचून ग्राऊंडच्या कडेला संशयास्पदरीत्या थांबलेल्या तिघांना ताब्यात घेतले. चौकशीत त्यांची नावे सुमित सुभाष शिंदे (वय २४), वैभव अनिल पेठे (वय २०) आणि साहिल अमोल कांबळे (वय १६) अशी असल्याचे निष्पन्न झाले. अंगझडतीदरम्यान वैभव पेठे याच्या कमरेत लपवून ठेवलेले सुमारे ४१ सेंटीमीटर लांबीचे लोखंडी मुठ असलेले धारदार शस्त्र जप्त करण्यात आले. या शस्त्राची किंमत सुमारे ३०० रुपये असल्याचे पोलिसांनी नमूद केले आहे.
पुणे शहरात लागू असलेल्या शस्त्रबंदी आदेशाचे उल्लंघन करून हे शस्त्र बाळगण्यात आल्याचे निष्पन्न झाल्याने तिघांविरोधात भारतीय हत्यार कायदा कलम ४ (२५), महाराष्ट्र पोलीस कायदा कलम ३७ (१)(३) सह १३५ आणि भारतीय न्याय संहिता २०२३ च्या कलम ३(५) अन्वये गुन्हा दाखल करण्यात आला आहे. या कारवाईचे नेतृत्व सहाय्यक पोलीस निरीक्षक अमित शेटे यांनी केले असून, पुढील तपास काळेपडळ पोलीस करीत आहेत.
