लोणी काळभोर, (पुणे) : कानिफनाथ गडाच्या घाटातील सिटी व्ह्यू पॉईंट परिसरात तरुण-तरुणींवर लाठ्या-काठ्या आणि दगडाने हल्ला करून त्यांना लुटणाऱ्या तीन आरोपींच्या मुसक्या फुरसुंगी पोलिसांनी अवघ्या 12 तासांच्या आत आवळल्या.
प्रतिक दिलीप फडतरे (वय 22, धंदा- रसवंतीगृह, रा. मु.पो. बोपगाव, ता. पुरंदर), ओंकार सुनील फडतरे (वय-27, धंदा- शेती, रा. बोपगाव, पुरंदर), गणेश नवनाथ कामठे (वय 27, धंदा- शेती, रा. चांबळी, चिलवाळी वस्ती, ता. पुरंदर, जि. पुणे) अशी अटक करण्यात आलेल्या आरोपींची नावे आहेत. आरोपींकडून पोलिसांनी स्प्लेंडर मोटारसायकल आणि लुटलेले मोबाईल असा एकूण 55 हजार रुपये किमतीचा मुद्देमाल हस्तगत केला आहे.
पोलिसांनी दिलेल्या माहितीनुसार, फुरसुंगी पोलीस ठाण्याच्या हद्दीत मंगळवारी (ता.11) पहाटे साडेचार वाजण्याच्या सुमारास फिर्यादी तरुण हा त्याचे मित्र आकाश, अथर्व आणि एक मैत्रीण यांच्यासोबत दोन ॲक्टिव्हा दुचाकीवरून कानिफनाथ मंदिराच्या हद्दीतील सिटी व्ह्यू पॉईंट जवळ निसर्ग पाहण्यासाठी आले होते. या वेळी तरुण-तरुणींना रस्त्यात आडवून वरील आरोपींनी हुज्जत घालत लाथाबुक्क्यांनी आणि रस्त्यावरील दगडांनी बेदम मारहाण करण्यास सुरुवात केली.
आरोपींनी फिर्यादी आणि त्याचा मित्र आकाश यांच्याकडून 15 हजार रुपये किमतीचे दोन महागडे मोबाईल हँडसेट आणि ऑनलाईन जबरदस्तीने घेतलेली 13 हजार 300 रुपयांची रोख रक्कम असा एकूण मुद्देमाल धाक दाखवून लुटला आणि अंधाराचा फायदा घेऊन पसार झाले होते. या घटनेची फुरसुंगी पोलीस ठाण्याचे वरिष्ठ पोलीस निरीक्षक अमोल मोरे यांनी तात्काळ गुन्ह्याची गांभीर्य लक्षात घेऊन पोलीस पथकाला शोध घेण्याच्या सूचना दिल्या.
दरम्यान, त्यानुसार पोलीस अंमलदार हेमंत कामथे आणि सागर वणवे यांच्या गोपनीय बातमीदारांनी दिलेल्या माहितीवरून तसेच हवालदार श्रीनाथ जाधव यांनी आरोपींच्या मोबाईल नंबरचे तांत्रिक विश्लेषण केले असता, हे तिघेही कानिफनाथ गडाच्या पायथ्याशी बोपगाव येथे लपून बसल्याचे निष्पन्न झाले. वरिष्ठांच्या आदेशानुसार फुरसुंगी पोलिसांच्या पथकाने कानिफनाथ पायथा, बोपगाव परिसरात वेढा दिला आणि संशयितांना ताब्यात घेतले. पोलिसी खाक्या दाखवताच त्यांनी गुन्ह्याची कबुली दिली.
सदरची कामगिरी फुरसुंगी पोलीस ठाण्यातील पोलीस उपनिरीक्षक बापुसाहेब खंदारे सहाय्यक पोलीस फौजदार कदम, पोलीस हवालदार नितीन गायकवाड, श्रीनाथ जाधव, सागर वणवे, हेमंत कामथे, योगेश गायकवाड आणि गणेश शिंदे यांनी केली आहे, तपास पथकाचे पोलीस उपनिरीक्षक विनोद पवार करीत आहे.
