पुणे : महाराष्ट्राची वाहिनी मानल्या जाणाऱ्या समृद्धी महामार्गावर एक मोठी आपत्कालीन घटना समोर आली आहे. महामार्गाला लागून असलेल्या मुख्य गॅस पाईपलाईनमध्ये अचानक तांत्रिक बिघाड होऊन मोठी गॅस गळती सुरू झाली आहे. यामुळे संपूर्ण परिसरात उग्र दुर्गंधी पसरली असून प्रवाशांमध्ये तीव्र भीतीचे वातावरण निर्माण झाले आहे.
गॅसच्या उग्र वासामुळे खबरदारीचा उपाय म्हणून प्रशासनाने नागपूरहून मुंबईच्या दिशेने जाणारी वाहतूक तात्काळ थांबवली आहे. त्यामुळे महामार्गावर वाहनांच्या अनेक किलोमीटरपर्यंत लांबच लांब रांगा लागल्या आहेत. प्रवाशांची गैरसोय टाळण्यासाठी प्रशासनाने लासूर हडस पिंपळगाव टोलनाक्यावरून वाहने इतर मार्गांनी वळवण्याचा निर्णय घेतला आहे.
ही घटना समृद्धी महामार्गावरील चॅनेल क्रमांक 451.2 जवळ घडली आहे. अपघाताची माहिती मिळताच स्थानिक प्रशासन, पोलीस पथक आणि अग्निशमन दलाच्या गाड्या तातडीने घटनास्थळी दाखल झाल्या आहेत. गॅस गळतीचे मुख्य कारण शोधून ती लवकरात लवकर बंद करण्यासाठी संबंधित यंत्रणेचे तंत्रज्ञ युद्धपातळीवर काम करत आहेत.
सुरक्षेचा उपाय म्हणून नागरिकांना व वाहनधारकांना बाधित परिसरापासून दूर राहण्याच्या सूचना देण्यात आल्या आहेत. परिस्थिती पूर्णपणे नियंत्रणात आल्यानंतरच महामार्गावरील थांबवलेली वाहतूक पूर्ववत सुरू करण्यात येईल.
