मुंबई: ‘बिग बॉस’ हिंदीचा १९ वा सीझन आणि मराठीचा ६ वा सीझन नुकताच संपला असून, आता सर्वांचे लक्ष ‘बिग बॉस २०’ कडे लागले आहे. हा नवीन सीझन लवकरच प्रेक्षकांच्या भेटीला येणार असल्याची जोरदार चर्चा सुरू आहे. या आगामी सीझनमध्ये निर्माते एक वेगळाच ‘जुने विरुद्ध नवीन’ असा फॉर्म्युला वापरणार असल्याचे बोलले जात आहे. म्हणजेच, या शोमध्ये मागील सीझनमधील काही लोकप्रिय स्पर्धक आणि नवीन चेहरे एकत्र स्पर्धा करताना दिसू शकतात.
जरी निर्मात्यांनी अधिकृत नावे अजून जाहीर केलेली नसली, तरीही संभाव्य स्पर्धकांच्या नावांची चर्चा रंगली आहे. मागील काही सीझनमधील लोकप्रिय चेहरे, जसे की, आसिम रियाज, शहनाज गिल आणि पारस छाबडा हे पुन्हा दिसणार का, याकडे चाहत्यांचे लक्ष आहे, मात्र याला अद्याप कोणतीही अधिकृत दुजोरा मिळालेला नाही.
याव्यतिरिक्त, रिधिमा गुप्ता, भागीरथ भट्ट, रुरू ठाकूर, अरबाज पटेल, भव्य सिंग, तुषार करवार आणि तरुण राज अरोरा यांसारख्या नावांची चर्चा आहे. सोबतच फैसल शेख, अंजली अरोरा, जन्नत जुबेर, एल्विश यादव, अनवेज दरबार आणि उर्फी जावेद हे देखील शोमध्ये दिसू शकतात, असा अंदाज लावला जात आहे. रिपोर्टनुसार, ‘बिग बॉस २०’ चे शूटिंग २१ सप्टेंबरपासून सुरू होण्याची शक्यता वर्तवण्यात आली आहे.
