थेऊर, ता. 02 : प्लॉटिंग व बिल्डिंग मटेरियल व्यावसायिक सचिन लोणकर यांच्यावर जुन्या आर्थिक व्यवहाराच्या वादातून दोघांनी प्राणघातक हल्ला केल्याची घटना घडली. एवढ्यावरच न थांबता हल्लेखोरांनी लोणकर यांच्या अलिशान फॉर्च्युनर गाडीची तोडफोड करत लोणकर यांच्या गळ्यातील 50 ग्रॅम सोन्याची साखळी, 50 हजार रुपयांची रोकड आणि महागडे घड्याळ जबरीने काढून घेण्यात आल्याचे फिर्यादीत म्हटले आहे. या प्रकरणी दोघांवर लोणीकंद पोलीस ठाण्यात गुन्हा दाखल करण्यात आला आहे. कोलवडी (ता. हवेली) हद्दीतील माळवाडी परिसरात बुधवारी (ता. 30) दुपारी पाऊणे एक वाजण्याच्या सुमरास ही घटना घडली.
याप्रकरणी गजानन गुलाब गायकवाड (वय -35) आणि आकाश कैलास अडसुळे (वय -30, दोघेही रा. कोलवडी) यांच्याविरोधात सचिन ज्ञानेश्वर लोणकर (वय-36) यांनी तक्रार दिली आहे.
पोलिसांनी दिलेल्या माहितीनुसार, लोणकर हे चिंतामणी इंटरप्रायजेस या नावाने प्लॉटिंग खरेदी-विक्री आणि बिल्डिंग मटेरियल पुरवठ्याचा व्यवसाय करतात. यापूर्वी ते गजानन गायकवाड याच्यासोबत लक्ष्मी डेव्हलपर्स या नावाने प्लॉटिंगचा व्यवसाय करत होते. मात्र, चार वर्षांपूर्वी हा व्यवसाय बंद झाला होता. त्यानंतर कोणताही व्यवहार शिल्लक नसताना गायकवाड हा त्यांच्याकडे पाच लाख रुपयांची मागणी करत असल्याचा आरोप लोणकर यांनी केला आहे. यापूर्वीही गायकवाड याने पिस्तूल असल्याची धमकी दिल्याचे त्यांनी जबाबात नमूद केले आहे.
बुधवारी दुपारी लोणकर हे माळवाडी येथील कार्यालयातून वाघोलीकडे जाण्यासाठी त्यांच्या फॉर्च्युनर गाडीजवळ आले असता, गायकवाड आणि अडसुळे यांनी लाकडी दांडके व लोखंडी रॉड घेऊन त्यांच्यावर हल्ला केल्याचे तक्रारीत म्हटले आहे. हल्लेखोरांनी पाठलाग करून त्यांच्या पाठीत, छातीवर, उजव्या पायावर, हातावर आणि बरगड्यांवर मारहाण केली. तसेच शिवीगाळ करून जीवे मारण्याची धमकी दिल्याचा आरोप आहे.
या झटापटीदरम्यान लोणकर यांच्या हातातील फॉसिल कंपनीचे घड्याळ, गळ्यातील सुमारे 50 ग्रॅम वजनाची सोन्याची चैन आणि खिशातील 50 हजार रुपये काढून घेतल्याचे तक्रारीत नमूद आहे. त्यानंतर दोघांनी कार्यालयाजवळ उभ्या असलेल्या फॉर्च्युनर गाडीच्या चारही बाजूंच्या काचा फोडून बोनेटचे नुकसान केले आणि पांढऱ्या रंगाच्या ऑरा गाडीतून घटनास्थळावरून पलायन केल्याचे लोणकर यांनी फिर्यादीत म्हटले आहे.
दरम्यान, जखमी लोणकर यांच्यावर रुग्णालयात उपचार सुरू असून, या प्रकरणी पोलिसांकडून पुढील कायदेशीर कारवाई करण्यात येत आहे.
