उरुळी कांचन : नायगाव रॉयल कॉलनी येथील मयूर चिकन सेंटरसमोरील रस्त्यावर एका 20 वर्षीय तरुणाला शिवीगाळ व दमदाटी करून चौघांनी मारहाण केल्याची घटना गुरुवारी (ता. 22) सायंकाळी पाच वाजण्याच्याच्या सुमारास घडली. या मारहाणीत एका तरुणाने दगडाने पाठीत मारल्याने तरुण जखमी झाला आहे.
याप्रकरणी उरुळी कांचन पोलिस ठाण्यात रेहान जमीर शेख आणि त्याच्या तीन अनोळखी साथीदारांविरुद्ध गुन्हा दाखल करण्यात आला आहे. तर समीर रहीस शेख (वय 20, रा. निगडेवस्ती, कुंजीरवाडी, ता. हवेली) असे मारहाण झालेल्या तरुणाचे नाव आहे. याबाबत समीर शेख याने उरुळी कांचन पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, समीर शेख हा नायगाव रॉयल कॉलनी येथील मयूर चिकन सेंटरच्या वाहनावर चालक म्हणून काम करतो. गुरुवारी सायंकाळी काम संपवून घरी जात असताना रेहान जमीर शेख याने त्याला रस्त्यावर बोलावले. तेथे रेहान आणि त्याचे तीन साथीदार दोन दुचाकींसह थांबले होते.
समीरने बोलावण्याचे कारण विचारले असता, रेहानने त्याला उद्देशून बोलल्यानंतर चौघांनी शिवीगाळ व दमदाटी केली. त्यानंतर त्याला खाली पाडून हाताने व लाथाबुक्क्यांनी मारहाण केली. यावेळी त्यांच्यापैकी एकाने रस्त्यावर पडलेल्या दगडाने समीरच्या पाठीवर मारल्याने त्याला दुखापत झाल्याचे फिर्यादीत नमूद आहे.
दरम्यान, घटनेनंतर समीरने आई आणि मित्रासह उरुळी कांचन पोलिस ठाण्यात धाव घेतली. पोलिसांनी त्याला उपचारासाठी सरकारी रुग्णालयात पाठवले. उपचारानंतर त्याने तक्रार दाखल केली. याप्रकरणी भारतीय न्याय संहितेच्या विविध कलमान्वये गुन्हा नोंदविण्यात आला असून, पोलिस हवालदार सोमनाथ चितारे पुढील तपास करीत आहेत.
