जुन्नर : प्रेमविवाहानंतर पती आणि सासरच्या मंडळींकडून मानसिक व शारीरिक त्रास दिला जात असल्याच्या आरोपातून २३ वर्षीय विवाहितेने माहेरी आई-वडिलांच्या घरी गळफास घेऊन आत्महत्या केल्याची घटना जुन्नर तालुक्यातील राजुरी येथे घडली. सायली सिद्धेश दांगट असे मृत विवाहितेचे नाव आहे. या प्रकरणी तिच्या आईने दिलेल्या फिर्यादीवरून पती सिद्धेश दांगट, सासू जयश्री दांगट आणि नणंद साक्षी दांगट यांच्याविरुद्ध आळेफाटा पोलीस ठाण्यात गुन्हा दाखल करण्यात आला आहे.
सायलीने १ डिसेंबर २०२५ रोजी सिद्धेश याच्याशी प्रेमविवाह केला होता. लग्नानंतर काही दिवसांतच पतीकडून त्रास सुरू झाल्याचा आरोप तिच्या आई अश्विनी कदम यांनी फिर्यादीत केला आहे. विवाहानंतर सायली आणि तिचा पती मुंबई येथे खासगी कंपनीत नोकरी करत होते.
पगाराचे पैसे घेतल्याचा, मंगळसूत्र गहाण ठेवल्याचा आरोप
फिर्यादीनुसार, सायलीच्या पगाराचे पैसे तिच्या पतीने स्वतःकडे घेतले होते. तसेच तिचे सोन्याचे मंगळसूत्र पतपेढीत गहाण ठेवल्याचा आरोपही करण्यात आला आहे. याबाबत सायलीने विचारणा केली असता पतीने तिला मारहाण केल्याचे तिच्या आईने तक्रारीत नमूद केले आहे. पतीसह सासू आणि नणंदेकडूनही मानसिक व शारीरिक त्रास दिला जात असल्याचा आरोप आहे.
त्रासाला कंटाळून सायली २० ऑक्टोबर रोजी माहेरी राजुरी येथे आली होती. त्यानंतर २३ ऑक्टोबर रोजी तिचे आई-वडील कामानिमित्त घराबाहेर गेले असताना, घरात एकटी असलेल्या सायलीने गळफास घेतल्याचे फिर्यादीत म्हटले आहे.
या घटनेनंतर परिसरात हळहळ व्यक्त होत आहे. विवाहितेच्या आत्महत्येप्रकरणी तिच्या पतीसह सासरच्या दोन सदस्यांविरुद्ध गुन्हा दाखल करण्यात आला असून, पुढील तपास आळेफाटा पोलीस ठाण्याचे पोलीस निरीक्षक विश्वास जाधव यांच्या मार्गदर्शनाखाली उपनिरीक्षक बळीराम घनटे करीत आहेत. या प्रकरणातील आरोपांची सत्यता तपासातून स्पष्ट होणार आहे.
