पुणे : मुंबई-पुणे द्रुतगती महामार्गावरील मिसिंग लिंकवरून प्रवास करणाऱ्या वाहनचालकांसाठी महत्त्वाची बातमी आहे. मिसिंग लिंकला जोडणाऱ्या खोपोली परिसरातील सुमारे १०० मीटर लांबीच्या रस्त्याची दुरवस्था झाली असून, महाराष्ट्र राज्य रस्ते विकास महामंडळाने (एमएसआरडीसी) ऐन दिवाळीतच त्याच्या दुरुस्तीचे काम हाती घेतले आहे. पाचपैकी दोन मार्गिका बंद करून काम सुरू असल्याने सणासुदीच्या काळात प्रवाशांची गैरसोय होत आहे.
एमएसआरडीसीतील वरिष्ठ अधिकाऱ्यांनी दिलेल्या माहितीनुसार, ३ नोव्हेंबरपासून पाचपैकी दोन मार्गिकांच्या दुरुस्तीला सुरुवात करण्यात आली आहे. या कामासाठी इपॉक्सी डांबराचा वापर केला जात आहे. दोन मार्गिका दुरुस्तीसाठी बंद असल्याने सध्या मिसिंग लिंककडे जाण्यासाठी केवळ तीन मार्गिका उपलब्ध आहेत.
त्यामुळे वाहनचालकांना अडचणींचा सामना करावा लागत आहे. मात्र, तीन मार्गिका वाहतुकीसाठी पुरेशा असल्याने कोणतीही मोठी अडचण निर्माण होत नसल्याचा दावा एमएसआरडीसीच्या अधिकाऱ्यांनी केला आहे.
सध्या सुरू असलेल्या दोन मार्गिकांचे काम पूर्ण झाल्यानंतर उर्वरित तीन मार्गिकांचीही दुरुस्ती केली जाणार आहे. संपूर्ण काम येत्या चार ते पाच दिवसांत पूर्ण करण्याचे नियोजन असल्याची माहिती अधिकाऱ्यांनी दिली.
दिवाळीच्या काळात दुरुस्तीचे काम सुरू असले, तरी आठवडाभरात ते पूर्ण होईल, असे एमएसआरडीसीकडून सांगण्यात आले आहे. त्यामुळे दिवाळीनंतर मुंबईच्या दिशेने परतणाऱ्या वाहनचालकांना आणि प्रवाशांना दिलासा मिळण्याची अपेक्षा आहे.
