पुणे : कात्रज-कोंढवा रोडवरील सुखसागरनगर परिसरात १८ वर्षीय तरुणीची छेडछाड करून तिला जबरदस्तीने उचलून नेण्याचा प्रयत्न केल्याची घटना समोर आली आहे. शनिवारी सायंकाळी घडलेल्या या प्रकारामुळे परिसरात खळबळ उडाली आहे. तरुणीच्या मदतीला तिची मैत्रीण आणि स्थानिक नागरिक धावून आल्याने अनर्थ टळला. नागरिकांनी संशयित आरोपीला पकडून पोलिसांच्या ताब्यात दिले. या घटनेचे सीसीटीव्ही फुटेजही समोर आले आहे.
जितु किशोरीलाल सरोज (वय ३०, मूळ रा. उत्तर प्रदेश) असे आरोपीचे नाव आहे. या प्रकरणी भारती विद्यापीठ पोलीस तपास करत आहेत.
पोलिसांनी दिलेल्या माहितीनुसार, तरुणी शनिवारी सायंकाळी साडेसहाच्या सुमारास सुखसागरनगर परिसरातील समर्थ डेअरीसमोर मैत्रिणीची वाट पाहत थांबली होती. त्यावेळी आरोपी तिच्याजवळ आला. त्याने तरुणीच्या छातीला हात लावून तिचा शर्ट ओढत तिला उचलून नेण्याचा प्रयत्न केल्याचा आरोप आहे.
तरुणीने आरडाओरड केल्यानंतर तिची मैत्रीण घटनास्थळी आली. तिने आरोपीला दूर ढकलण्याचा प्रयत्न केला. या झटापटीत तरुणी खाली पडून तिच्या हाताला दुखापत झाली. तरीही आरोपीने तिच्या मैत्रिणीला ढकलून तरुणीला घेऊन जाण्याचा प्रयत्न केल्याचे पीडितेने सांगितले.
घटनेचा गोंधळ ऐकून परिसरातील नागरिक मदतीसाठी धावले. त्यांनी आरोपीला रोखण्याचा प्रयत्न केला असता, त्याने नागरिकांनाही मारण्याचा प्रयत्न केल्याचा आरोप आहे. यावेळी एका व्यक्तीचा मोबाईल जमिनीवर फेकून फोडल्याचेही तक्रारीत नमूद करण्यात आले आहे. अखेर नागरिकांनी आरोपीला पकडून पोलिसांच्या ताब्यात दिले.
पीडित तरुणीने दिलेल्या माहितीनुसार, आरोपी तिच्यासाठी पूर्णपणे अनोळखी होता. त्याने अचानक जवळ येऊन तिला उचलून नेण्याचा प्रयत्न केला. मैत्रिणीने वेळीच हस्तक्षेप केल्यामुळे आणि नागरिक मदतीला आल्यामुळे आपण बचावलो, असे तिने सांगितले. या प्रकरणात आरोपीविरुद्ध कायदेशीर कारवाई करण्याची मागणीही तिने केली आहे.
घटनेचे सीसीटीव्ही फुटेज समोर आल्यानंतर परिसरातील सुरक्षेचा प्रश्न पुन्हा चर्चेत आला आहे. भारती विद्यापीठ पोलीस या प्रकरणाचा पुढील तपास करत असून, तपासातून अधिक माहिती समोर येण्याची अपेक्षा आहे.
