पुणे : राष्ट्रीय कंपनी कायदा न्यायाधिकरणाने व्हिडिओकॉन ग्रुपचे माजी प्रवर्तक वेणुगोपाल नंदलाल धूत यांना दिवाळखोर म्हणून घोषित केले आहे. स्टेट बँक ऑफ इंडिया आणि अन्य बँकांचे एकूण ₹12,668.06 कोटींचे कर्ज फेडण्यात ते अपयशी ठरल्यामुळे हा मोठा निर्णय घेण्यात आला आहे.
ही कायदेशीर कारवाई कशी पुढे सरकली, यावर नजर टाकल्यास समजेल की, व्हिडिओकॉन कंपन्या आर्थिक संकटत सापडल्यामुळे जून 2018 मध्येच कंपनीविरुद्ध दिवाळखोरी प्रक्रिया सुरू झाली होती. बँकांचे कर्ज चुकवण्यासाठी धूत यांनी सुरुवातीला पहिल्या 36 महिन्यांत ₹600 कोटी देण्याचा प्रस्ताव ठेवला होता, मात्र कर्जदात्या बँकांनी तो फेटाळून लावला. त्यानंतर SBI ने दिवाळखोरी आणि नादारी संहितेच्या कलमांतर्गत न्यायालयात धाव घेतली. मुंबई NCLT पिठाने हा अर्ज मंजूर करत धूत यांच्यावर ही कारवाई केली.
न्यायाधिकरणाने आशिष नारायण यांची दिवाळखोरी विश्वस्त म्हणून नेमणूक केली आहे. धूत यांची सर्व वैयक्तिक संपत्ती आता या विश्वस्तांच्या ताब्यात गेली असून, त्यांना 90 दिवसांच्या आत न्यायालयात प्राथमिक अहवाल सादर करावा लागेल. तसेच, धूत यांना आगामी सात दिवसांच्या आत आपल्या संपूर्ण संपत्ती आणि आर्थिक स्थितीचा सविस्तर तपशील विश्वस्तांकडे सुपूर्द करण्याचे आदेश न्यायालयाने दिले आहेत.
ही थकबाकी नेमकी किती आहे, याचे गणित पाहिल्यास, 30 सप्टेंबर 2026 पर्यंत ही रक्कम वाढून ₹12,668 कोटींवर पोहोचली आहे. यामध्ये विविध बँकांच्या टर्म लोनचे ₹9,322.10 कोटी, व्हिडिओकॉन टेलिकम्युनिकेशन्स सुविधेचे ₹1,437.76 कोटी आणि खेळत्या भांडवलापोटी घेतलेले ₹1,908.19 कोटी समाविष्ट आहेत. व्हिडिओकॉन कंपन्यांसाठी धूत यांनी वैयक्तिक हमी दिली होती, जी आता बँकांसाठी वसुलीचा मार्ग बनली आहे.
