कोल्हापूर : सोशल मीडियावरील ओळखीतून अल्पवयीन मुलीला गुजरातमध्ये नेऊन डांबून ठेवल्याचा आणि तिच्यावर अत्याचार केल्याचा गंभीर प्रकार समोर आला आहे. या प्रकरणी शिवाजीनगर पोलिसांनी राहुल राजू दामोर (वय १९, रा. नावगाव, मध्य प्रदेश) याला अटक केली आहे. न्यायालयाने त्याला २८ ऑक्टोबरपर्यंत पोलीस कोठडी सुनावली आहे. पीडित मुलीची गुजरातमधील भावनगर येथून सुटका करण्यात आली असून, या प्रकरणाचा पुढील तपास सुरू आहे.
इचलकरंजी येथील अल्पवयीन मुलगी बेपत्ता झाल्याची तक्रार शिवाजीनगर पोलीस ठाण्यात दाखल करण्यात आली होती. या प्रकरणाचा तपास पोलीस उपनिरीक्षक डॉ. आरती कणिरे करत होत्या. मुलीचा शोध घेण्यासाठी पोलिसांनी तांत्रिक तपास सुरू केला. त्यावेळी तिचे लोकेशन गुजरातमधील भावनगर येथे असल्याचे निष्पन्न झाले.
पोलिसांनी तांत्रिक माहितीच्या आधारे तपासाची दिशा निश्चित केली. इन्स्टाग्रामवरून झालेल्या ओळखीतून मध्य प्रदेशातील तरुणाने मुलीला घरातून नेल्याची माहिती तपासात समोर आली. त्यानंतर शिवाजीनगर पोलिसांचे पथक गुजरातमधील भावनगर येथे पोहोचले. तेथून राहुल राजू दामोर याला अटक करण्यात आली आणि मुलीची त्याच्या ताब्यातून सुटका करण्यात आली.
पोलिसांच्या माहितीनुसार, मुलीला डांबून ठेवण्यात आले होते आणि तिच्यावर जबरदस्तीने अत्याचार करण्यात आल्याचा आरोप आहे. या प्रकरणी आरोपीविरुद्ध पोक्सो कायद्यांतर्गत गुन्हा दाखल करण्यात आला आहे. आरोपीला इचलकरंजी न्यायालयात हजर केले असता, न्यायालयाने त्याला २८ ऑक्टोबरपर्यंत पोलीस कोठडी सुनावली.
या कारवाईत पोलीस हेडकॉन्स्टेबल सुनील माळी आणि कोल्हापूर सायबर सेलने महत्त्वाची भूमिका बजावली. सोशल मीडियावरील ओळखीच्या माध्यमातून घडलेल्या या प्रकरणाचा तपास पोलीस करत असून, पुढील चौकशीत अधिक माहिती समोर येण्याची शक्यता आहे.
