सांगली : दुचाकी हिसकावून घेण्यास विरोध केल्याने चौघांनी एका युवकास लोखंडी रॉड आणि काठीने मारहाण केली. यामध्ये संदीप पांडुरंग जाधव (रा. शंभर फुटी रस्ता, त्रिमूर्ती कॉलनी, सांगली) हे जखमी झाले आहेत. ही घटना १५ जुलै रोजी रात्री १०.३० च्या सुमारास शंभर फुटी रस्त्यावरील एका औषध विक्रीच्या दुकानासमोर घडली.
पोलिसांनी संशयित रियाज अफराज, फिरोज, सलीम आणि गणेश (सर्व रा. शंभर फुटी रस्ता, वीज केंद्राच्या पाठीमागे, सांगली) यांच्यावर गुन्हा दाखल केला आहे. फिर्यादी संदीप यांचा चौघा संशयितांशी परिचय होता. रात्री १०.३० च्या सुमारास संदीप हे शंभर फुटी रस्त्यावरुन जात असता चौघांनी त्यांना अडविले आणि त्यांच्याकडील दुचाकी हिसकावून घेण्याचा प्रयत्न केला. याला विरोध केल्यामुळे चिडलेल्या चौघांनी फिर्यादी संदीप यांना शिवीगाळ करुन लाथाबुक्क्यांनी मारहाण केली. त्याचप्रमाणे लोखंडी रॉड आणि काठीने देखील मारहाण केली. यामध्ये संदीप गंभीर जखमी झाल्याचे फिर्यादीत नमूद केले आहे.
