कोल्हापूर : कोल्हापूर जिल्ह्यातील आजरा तालुक्यातून एक धक्कादायक घटना समोर येत आहे. शरीर संबंधास नकार दिला म्हणून एका नराधमाने महिलेची हत्या केली. हा प्रकार उघडकीस येऊ नये म्हणून आरोपीने मृतदेह ऊसाच्या फडात फेकला आणि पेटवून दिला. मात्र, हा सर्व प्रकार सीसीटीव्हीत कैद झाल्याने आरोपीचे बिंग फुटले.
याप्रकरणी पोलिसांनी आरोपीला ताब्यात घेतलं असून गुन्हा दाखल केला आहे. योगेश पांडुरंग पाटील (वय ४६, रा. भादवन) असं अटक करण्यात आलेल्या संशयित आरोपीचं नाव आहे. या घटनेनं परिसरातून संताप व्यक्त केला जात आहे.
पोलिसांनी दिलेल्या अधिक माहितीनुसार, मृत महिलेच्या पतीचं निधन झाल्याने ती आईसोबत भादवन येथे राहत होती. पीडिता विधवा असल्याने आरोपीचा तिच्यावर डोळा होता. शुक्रवारी मृत महिला भादवन ते भादवनवाडी रस्त्यावरून जात असताना आरोपीने तिच्यावर अतिप्रसंग करण्याचा प्रयत्न केला. यावेळी महिलने त्याला विरोध केला. त्यामुळे रंगाच्या भारत आरोपीने तिचा गळा आवळून खून केला.
हा प्रकार झाकला जावा म्हणून त्याने मृतदेह ऊसाच्या फडात फेकून पेटवून दिला. दरम्यान, ऊसाच्या फडाला आग लागल्याचं कळताच गावकऱ्यांनी घटनास्थळी धाव घेतली. धक्कादायक बाब म्हणजे घडलेला प्रकार उघडकीस येऊ नये म्हणून आग विझवण्यासाठी आरोपी योगेशने प्रयत्न करत होता. त्यामुळे हा प्रकार इतरांच्या लक्षात आला नाही. मात्र, पोलिसांनी सीसीटीव्हीच्या माध्यमातून हा गुन्हा उघडकीस आणला. अधिक तपास पोलीस करत आहेत.
