सोलापूर: राज्यात वैष्णवी हगवणे प्रकरणाची चर्चा सुरु असतांनाच सोलापुरातून आणखी एक हृदयद्रावक आणि धक्कादायक घटना समोर आली आहे. मोहोळ तालुक्यातील चिंचोलीकाटी येथे राहणाऱ्या २२ वर्षीय आशाराणी भोसले या विवाहितेने गळफास घेऊन आत्महत्या केल्याची घटना समोर आली असली, तरी तिच्या कुटुंबीयांनी ही आत्महत्या नसून हत्या असल्याचा थेट आरोप केला आहे. विशेष म्हणजे आशाराणीच्या बहिणीने या प्रकरणात थेट तिच्या पती, सासू आणि सासऱ्यांविरोधात गंभीर आरोप करत खळबळ उडवून दिली आहे.
सततच्या छळाला कंटाळून जीवन संपवलं?
आशाराणी भोसले यांचे पती पवन भोसले, सासू अलका भोसले आणि सासरे बलभीम भोसले हे तिला सतत पैशासाठी आणि चारचाकी वाहनासाठी छळत होते, असा दावा तिच्या वडिलांनी पोलिसांत दिलेल्या फिर्यादीत केला आहे. आशाराणी केवळ २२ वर्षांची असून तिच्या मागे तीन वर्षांची मुलगी आहे. विशेष म्हणजे ती सध्या तीन महिन्यांची गर्भवतीही होती.
आशाराणीच्या कुटुंबीयांच्या मते, ही आत्महत्या नसून तिचा योजनाबद्ध खून आहे. यापूर्वीही सासरच्या मंडळींनी तिला विषारी औषध पाजून मारण्याचा प्रयत्न केला होता. त्या वेळी प्रकरण मिटवले गेले, मात्र त्यानंतरही तिला मारहाण आणि मानसिक त्रास दिला जात होता. या सगळ्याला कंटाळूनच तिने अखेरचा टोकाचा निर्णय घेतल्याचे कुटुंबीयांचे म्हणणे आहे.
“ही आत्महत्या नाही, हत्या आहे”
आशाराणी भोसले यांची बहीण उषाराणी हिने माध्यमांसमोर आणि पोलिसांसमोर केलेले आरोप अत्यंत गंभीर स्वरूपाचे आहेत. “मी देखील त्याच घरात राहत होते. पण सासूच्या अत्याचाराला कंटाळून मी तिथून बाहेर पडले. माझ्या बहिणीवरही तसाच छळ सुरु होता. तिचा नवरा खूप संशय घेणारा होता. तो तिला मोबाईल वापरू देत नव्हता, घराबाहेर जाताना बाहेरून दरवाजा लावत होता. ‘पहिली मुलगी माझी नाही’ असा आरोप करत तिचा मानसिक छळ करत होता,” असे ती म्हणाली. तिच्या मते, आशाराणी इतकी आत्मविश्वासी होती की आत्महत्या करेल, हे अशक्य आहे. “गळफास लावलेलं ठिकाण इतकं उंच होतं की तिचा हात तिथपर्यंत पोहोचणारच नाही. त्यामुळे ही आत्महत्या नाही, हत्या आहे,” असा दावा उषाराणी हिने केला आहे.
किडनॅप करून लग्नाचा आरोप
या प्रकरणात आणखी एक धक्कादायक बाब समोर आली आहे. आशाराणी आणि उषाराणी या दोघी बहिणी एका घरात दिल्या गेल्या होत्या. परंतु कुटुंबीयांचा आरोप आहे की, आशाराणी हिला जबरदस्तीने, म्हणजेच किडनॅप करून तिचे लग्न लावण्यात आले होते. त्यामुळे या नात्याला तिच्या मनात फारसा आदर नव्हता, आणि तिच्यावर सुरू असलेला छळ तिच्या सहनशक्तीच्या पलीकडे गेला होता.
तीघांना अटक, गंभीर कलमान्वये गुन्हा दाखल
या प्रकरणातील मुख्य आरोपी पवन भोसले याला पोलिसांनी रात्रीच ताब्यात घेतलं होतं. त्यानंतर सासू अलका भोसले आणि सासरे बलभीम भोसले यांनाही अटक करण्यात आली आहे. तिघांविरोधात मोहोळ पोलीस ठाण्यात भारतीय दंड संहितेच्या (BNS) कलम 80(2), 115(2), आणि 3(5) नुसार गंभीर गुन्हा दाखल करण्यात आला आहे. पोलीस या प्रकरणाचा सखोल तपास करत असून शवविच्छेदनाचा अहवाल, घरातील साक्षी, आणि परिस्थितिजन्य पुरावे यावरून तपासाचा पुढील दिशा ठरणार आहे. आशाराणीच्या मृत्यूनंतर तिच्या लहान मुलीचा आणि अजून न जन्मलेल्या बाळाचा काय होईल, याबाबतही समाजात चिंता व्यक्त होत आहे.
