पोपटराव पाचंगे
पुणे : पुणे जिल्ह्यातील शिरूर कृषी उत्पन्न बाजार समितीच्या आगामी पंचवार्षिक निवडणुकीतून 71 ग्रामपंचायतींमधील तब्बल 712 सदस्यांना वगळण्यात आल्यामुळे स्थानिक राजकीय वर्तुळात मोठी खळबळ उडाली आहे. जिल्हा उपनिबंधक (सहकारी संस्था, पुणे ग्रामीण) प्रकाश जगताप यांनी अंतिम मतदारयादी प्रसिद्ध करताना हा निर्णय दिला असून, यामुळे संबंधित सदस्यांना मतदानाच्या हक्कापासून दूर राहावे लागणार आहे.
यापूर्वी उच्च न्यायालयाच्या आदेशानुसार 1 फेब्रुवारी 2026 रोजी पदावर असलेल्या 729 सदस्यांचा समावेश करून नव्याने निवडणूक प्रक्रिया राबवण्याचे निर्देश दिले होते. या निर्देशांचे पालन करत 7 सप्टेंबर रोजी प्रारूप मतदारयादी जाहीर करून त्यावर आक्षेप मागवण्यात आले होते. 21 आणि 24 सप्टेंबर रोजी झालेल्या सुनावणीनंतर, प्रशासक नियुक्तीचे कारण देत जिल्हा निवडणूक अधिकाऱ्यांनी 712 सदस्यांची नावे मतदारयादीतून वगळण्याचा निर्णय घेतला.
गटविकास अधिकाऱ्यांच्या मतानुसार 4 फेब्रुवारीच्या नियमानुसार 1 फेब्रुवारी रोजी कार्यरत असलेल्या सदस्यांची यादी गृहीत धरणे आवश्यक होते. परंतु, प्रशासकीय कारणास्तव सदस्यांना वगळल्यामुळे शिरूर-हवेलीचे माजी आमदार ॲड. अशोक पवार यांनी तीव्र असंतोष व्यक्त केला आहे. प्रशासनाच्या या निर्णयाविरोधात आपण पुन्हा एकदा उच्च न्यायालयात दाद मागणार असल्याचे त्यांनी स्पष्ट केले.
वगळण्यात आलेल्या प्रमुख ग्रामपंचायती:
कोरेगाव भीमा, शिक्रापूर, सणसवाडी, वढू बुद्रुक, तळेगाव ढमढेरे, पाबळ, केंदूर, कारेगाव, डिंग्रजवाडी, वाडा पुनर्वसन, दरेकरवाडी, विठ्ठलवाडी, पिंपळे जगताप, बाभूळसर खुर्द, धामारी, करंदी, मुखई, हिवरे कुंभार, जातेगाव बुद्रुक, जातेगाव खुर्द, खैरेनगर, खैरेवाडी, गणेगाव खालसा, पिंपरी दुमाला, वाघाळे, वरुडे, खंडाळे, बुरुंजवाडी, निमगाव भोगी, निमगाव म्हाळुंगी, आपटी, टाकळी भीमा, उरळगाव, दहिवडी, पारोडी, गणेगाव दुमाला, नागरगाव, सादलगाव, आंधळगाव, कोळगाव डोळस, कुरुळी, निर्वी, मोटेवाडी, भांबर्डे, गोलेगाव, इनामगाव, वडगाव रासाई, शिरसगाव काटा, बाभूळसर बुद्रुक, पिंपळसुटी, चिंचणी, गुनाट, निमोणे, शिंदोडी, कान्हूर मेसाई, चिंचोली मोराची, फाकटे, वडनेर खुर्द, मलठण, रावडेवाडी, सविंदणे, आमदाबाद, चांडोह आणि निमगाव दुडे
