पुणे : भारताचा अनुभवी लेग-स्पिनर युझवेंद्र चहल याने प्रथम-श्रेणी (रेड-बॉल) क्रिकेटमधून निवृत्तीची घोषणा केली आहे. सोशल मीडियावर एक भावूक पोस्ट शेअर करत त्याने या निर्णयाची माहिती दिली. भारताकडून कसोटी क्रिकेट खेळण्याचे आपले स्वप्न अपूर्ण राहिल्याची खंत त्याने व्यक्त केली, तरीही रेड-बॉल क्रिकेटने आपल्याला संयम आणि संघर्ष करण्याची ताकद दिली असे त्याने आवर्जून सांगितले.
जरी चहलने प्रथम-श्रेणी क्रिकेटला अलविदा केला असला, तरी तो क्रिकेटच्या इतर फॉरमॅटमध्ये सक्रिय राहणार आहे. भारतीय संघात एकदिवसीय आणि टी-20 सामन्यांमध्ये पुनरागमन करण्याची त्याची तीव्र इच्छा आहे. देशासाठी पुन्हा मैदानात उतरण्यासाठी आपण सर्वतोपरी प्रयत्न करणार असल्याचे त्याने स्पष्ट केले.
युझवेंद्र चहलच्या प्रथम-श्रेणी कारकिर्दीवर नजर टाकल्यास, त्याने 2009 मध्ये हरियाणा संघाकडून पदार्पण केले होते. एकूण 49 प्रथम-श्रेणी सामन्यांमध्ये त्याने 32.27 च्या सरासरीने 148 बळी टिपले आहेत. नुकत्याच झालेल्या 2026 च्या काउंटी चॅम्पियनशिप डिव्हिजन-2 मध्ये नॉर्थम्प्टनशायरकडून खेळताना त्याने उत्कृष्ट कामगिरी केली आणि 16.14 च्या सरासरीने 21 विकेट्स घेतल्या. मिडलसेक्सविरुद्ध लॉर्ड्सच्या मैदानावर खेळलेला सामना हा त्याच्या प्रथम-श्रेणी कारकिर्दीतील शेवटचा सामना ठरला.
हरियाणाकडून खेळताना चहलने 2016-17 च्या रणजी ट्रॉफी हंगामात अप्रतिम गोलंदाजी केली होती. त्या मोसमात 7 सामन्यांत त्याने 22.60 च्या सरासरीने 33 बळी घेतले होते. त्यानंतर मात्र त्याला लाल चेंडूच्या क्रिकेटमध्ये मर्यादित संधी मिळाल्या.
भारतीय संघासाठी चहलने अद्याप कसोटी पदार्पण केलेले नाही. परंतु, मर्यादित षटकांच्या क्रिकेटमध्ये त्याची कामगिरी चमकदार राहिली आहे. त्याने भारतासाठी 72 एकदिवसीय आणि 80 टी-20 सामने खेळले आहेत. ऑगस्ट 2023 मध्ये तो शेवटचा आंतरराष्ट्रीय सामना खेळला होता.
सध्या चहल व्यावसायिक क्रिकेटमध्ये पूर्णपणे सक्रिय आहे. आयपीएल च्या इतिहासात सर्वाधिक विकेट्स घेणारा गोलंदाज म्हणून त्याचा मोठा दबदबा आहे. आगामी काळातही तो पंजाब किंग्स संघाकडून आपली फिरकीची जादू दाखवताना दिसेल.
