पुणे: विधान परिषदेच्या शिक्षक आणि पदवीधर मतदारसंघांच्या निवडणुकीत उमेदवारी अर्ज भरण्याच्या अंतिम टप्प्यात महायुतीतील अंतर्गत मतभेद चव्हाट्यावर आले आहेत. निवडणुकीच्या सुरुवातीला महायुती म्हणून एकत्रितपणे निवडणूक लढवण्याचे दावे करण्यात आले होते. मात्र, स्थानिक पातळीवरील राजकीय समीकरणे वेगळी असून भाजप, शिवसेना शिंदे गट आणि राष्ट्रवादी काँग्रेस अजित पवार गटातील नेत्यांनी एकमेकांविरोधात उमेदवारी अर्ज दाखल केल्याने महायुतीतच तिरंगी लढतीचे चित्र निर्माण झाले आहे.
विधान परिषदेच्या पाच जागांसाठी निवडणूक जाहीर झाल्यानंतर महायुतीतील वरिष्ठ नेत्यांनी एकत्रितपणे निवडणूक लढण्याची भूमिका मांडली होती. मात्र, शिक्षक आणि पदवीधर मतदारसंघांमध्ये स्थानिक नेत्यांच्या वेगवेगळ्या भूमिका समोर आल्या. पुणे शिक्षक मतदारसंघासाठी भाजपने कौस्तुभ गावडे यांना अधिकृत उमेदवारी दिली आहे. दुसरीकडे शिवसेना शिंदे गटाने मंगेश चिवटे यांना पक्षाचा एबी फॉर्म दिला आहे. त्यामुळे दोन्ही पक्षांचे उमेदवार आमनेसामने आले आहेत. याशिवाय भाजपचे बब्रुवाहन रोंगे यांनीही अपक्ष उमेदवारी अर्ज दाखल केल्याने भाजपसमोरील अडचणी वाढल्या आहेत.
मंगेश चिवटे यांनी उमेदवारी अर्ज दाखल करताना मंत्री उदय सामंत आणि प्रकाश आबीटकर उपस्थित होते. त्यामुळे शिंदे गटाने या निवडणुकीत आपली ताकद लावण्याचे संकेत दिले आहेत. शिक्षक मतदारसंघाप्रमाणेच पदवीधर मतदारसंघातही महायुतीतील अंतर्गत नाराजी उघड झाली आहे.
पुणे विभाग पदवीधर मतदारसंघातून राष्ट्रवादी काँग्रेसच्या अजित पवार गटाचे निष्ठावंत कार्यकर्ते, शिवाजी विद्यापीठाचे माजी सिनेट सदस्य आणि कोल्हापूर जिल्हा मध्यवर्ती सहकारी बँकेचे संचालक प्रताप उर्फ भैय्या माने यांनी अपक्ष उमेदवारी अर्ज दाखल केला आहे. पक्षाकडून उमेदवारी न मिळाल्याने त्यांनी ही भूमिका घेतली असून, कोणत्याही परिस्थितीत निवडणुकीच्या रिंगणातून माघार घेणार नसल्याचे त्यांनी स्पष्ट केले.
माने यांनी पक्ष नेतृत्वावरही नाराजी व्यक्त केली. मागील निवडणुकीत वरिष्ठ नेत्यांनी आपल्याला माघार घेण्याची विनंती केली होती आणि पुढील निवडणुकीत संधी देण्याचे आश्वासन दिले होते, असा दावा त्यांनी केला. मात्र यंदा उमेदवारी न मिळाल्याने आपल्यावर अन्याय झाल्याची भावना त्यांनी व्यक्त केली. त्यामुळे पुणे विभागातील शिक्षक आणि पदवीधर निवडणुकीत महायुतीतील घटक पक्षच एकमेकांसमोर उभे ठाकल्याने या लढतीकडे आता राजकीय वर्तुळाचे लक्ष लागले आहे.
