अहिल्यानगर :अहिल्यानगर जिल्ह्यातील (Ahilyanagar News) तारकेश्वर गडाचे महंत आदिनाथ महाराज शास्त्री गंभीर जखमी झाल्याची धक्कादायक घटना समोर आली आहे. प्राथमिक माहितीनुसार त्यांनी स्वतःवरच वार केल्याची शक्यता व्यक्त करण्यात येत आहे. जखमी अवस्थेत त्यांना तातडीने अहिल्यानगरमधील एका खासगी रुग्णालयात दाखल करण्यात आले असून सध्या अतिदक्षता विभागात त्यांच्यावर उपचार सुरू आहेत. (Latest Marathi News)
मिळालेल्या माहितीनुसार, ही घटना सायंकाळी सुमारे 5.30 वाजण्याच्या सुमारास घडली. त्या वेळी आदिनाथ महाराज गडावर उपस्थित होते. त्यांनी सर्व भक्तांना खोलीच्या बाहेर थांबण्यास सांगितले आणि स्वतः एकटेच खोलीत गेले. काही वेळानंतर त्यांनी स्वतःवरच वार केल्याची माहिती समोर आली. ही बाब लक्षात येताच उपस्थितांनी तातडीने त्यांना रुग्णवाहिकेतून रुग्णालयात हलवले.
या घटनेमागील नेमके कारण अद्याप स्पष्ट झालेले नाही. महाराजांनी हे पाऊल का उचलले, याबाबत कोणतीही अधिकृत माहिती समोर आलेली नसून याबाबत पुढील चौकशी सुरू आहे.
तारकेश्वर गडाचे महंत म्हणून आदिनाथ महाराज शास्त्री यांना मानणारा मोठा भक्तवर्ग आहे. विशेषतः अहिल्यानगर जिल्ह्यातील पाथर्डी तालुका आणि बीड जिल्ह्यात त्यांचा मोठा भक्त परिवार आहे. त्यामुळे या घटनेची माहिती समोर येताच त्यांच्या भक्तांमध्ये मोठी खळबळ उडाली आहे.
दरम्यान, रुग्णालयातील डॉक्टरांकडून त्यांच्यावर उपचार सुरू असून त्यांच्या प्रकृतीबाबत अद्याप अधिकृत माहिती देण्यात आलेली नाही. या घटनेमुळे परिसरात चर्चा सुरू असून नेमके काय घडले याबाबत स्पष्टता येण्याची प्रतीक्षा आहे.
