सोलापूर: कौटुंबिक वादातून झालेल्या भांडणाचा शेवट एका 23 वर्षीय महिलेच्या मृत्यूने झाला. दक्षिण सोलापूर तालुक्यातील वडापूर येथील गायत्री यशवंत हेगडे, असे मृत्यू झालेल्या महिलेचे नाव आहे. गायत्री पतीसोबत मोहोळ तालुक्यातील कुरुल येथे राहत होती. या प्रकरणी तिचा पती यशवंत ऊर्फ आबू भारत हेगडे याच्याविरुद्ध कामती पोलीस ठाण्यात खुनाचा गुन्हा दाखल करण्यात आला आहे.
पोलिसांनी दिलेल्या माहितीनुसार, कुरुल परिसरातील वीटभट्टीवर हे दाम्पत्य राहत होते. पतीला दारूचे व्यसन असल्याने त्यावरून दोघांमध्ये अनेकदा वाद होत असल्याचे समोर आले आहे. घटनेच्या दिवशीही याच कारणावरून पती-पत्नीमध्ये वाद झाला.
दारू पिऊ नये, अन्यथा आपण आपल्या आईकडे माहेरी जाऊ, असे गायत्रीने पतीला सांगितल्याची माहिती आहे. या बोलण्यावरून यशवंत संतप्त झाला. सुरुवातीचा वाद वाढत गेल्यानंतर त्याने पत्नीला शिवीगाळ करत जीवे मारण्याची धमकी दिल्याचा आरोप आहे.
त्यानंतर त्याने वीट आणि ऊस तोडण्यासाठी वापरल्या जाणाऱ्या कोयत्याने गायत्रीवर हल्ला केल्याचे पोलिसांच्या प्राथमिक तपासात समोर आले आहे. तिच्या डोक्यावर, चेहऱ्यावर आणि डाव्या हातावर वार झाल्याने ती गंभीर जखमी झाली. ही घटना मोहोळ तालुक्यातील कुरुल ते कातेवाडी रस्त्यावरील वीटभट्टी परिसरात सायंकाळी सुमारे 5 वाजता घडली. हल्ल्यानंतर गायत्रीला उपचारासाठी रुग्णालयात दाखल करण्यात आले. मात्र उपचार सुरू असताना तिचा मृत्यू झाला.
पोलिसांनी प्रकरणाची नोंद करून पती यशवंत हेगडे याच्याविरुद्ध खुनाचा गुन्हा दाखल केला आहे. या घटनेचा पुढील तपास पोलीस करत असून, हल्ल्यामागील नेमकी परिस्थिती आणि इतर बाबींची चौकशी सुरू आहे.
