पुणे : महाराष्ट्र विधान परिषद निवडणुकीच्या रिंगणात काँग्रेस पक्षाने आघाडी घेत आपल्या उमेदवारांची यादी जाहीर केली आहे. यामध्ये नागपूर पदवीधर मतदारसंघातून अभिजीत वंजारी यांना पुन्हा एकदा निवडणूक लढवण्याची संधी देण्यात आली आहे. तर पुणे शिक्षक मतदारसंघासाठी जयंत आसगावकर यांच्या नावावर पक्षाने शिक्कामोर्तब केले आहे.
दुसरीकडे, अमरावती शिक्षक मतदारसंघातून प्रा. आदिती पोहरे यांची उमेदवारी अखेर अधिकृतपणे घोषित झाली आहे. या जागेसाठी त्यांच्या नावाची चर्चा आधीपासूनच सुरू होती आणि काँग्रेस नेत्या यशमती ठाकूर यांनीही याचे संकेत दिले होते. उच्चशिक्षित असलेल्या प्रा. आदिती पोहरे यांनी अमरावती येथील शासकीय अभियांत्रिकी महाविद्यालयातून स्ट्रक्चरल डिझाईन विषयात एम.ई. पदवी मिळवली आहे, तसेच इंदिरा गांधी राष्ट्रीय मुक्त विद्यापीठातून मानसशास्त्र विषयात एम.ए.केले आहे. सध्याचे आमदार किरण सरनाईक यांचा कार्यकाळ 6 डिसेंबर रोजी समाप्त होत असल्याने या जागेसाठी आगामी काळात मतदान पार पडणार आहे.
काँग्रेसने आपले उमेदवार तातडीने रिंगणात उतरवले असले तरी सत्ताधारी महायुतीमध्ये मात्र जागावाटपावरून अजूनही पेच कायम असल्याचे दिसते. पुण्यातील पदवीधर आणि शिक्षक या दोन्ही जागांवर भाजपने आपला दावा ठोकला आहे. परंतु, राष्ट्रवादी काँग्रेसने पुणे पदवीधर जागेवर, तर शिवसेना (शिंदे गट) पक्षाने शिक्षक मतदारसंघावर आपला हक्क सांगितला आहे.
त्यामुळे महायुतीच्या अंतर्गत वाटाघाटींमध्ये या महत्त्वाच्या जागा नक्की कोणाच्या पदरात पडतात, याकडे सर्वांचे लक्ष लागले आहे.
