पुणे: जुन्या पुणे-मुंबई महामार्गावर वाहन चालवताना हॉर्न वाजवल्याच्या कारणावरून एसटी बसचालकासोबत वाद झाल्याची घटना खंडाळा परिसरात घडली आहे. या वादाचे रूपांतर मारहाणीत झाल्याचा आरोप असून, लोणावळा शहर पोलीस ठाण्यात एका व्यक्तीविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना 30 सप्टेंबर रोजी सायंकाळच्या सुमारास खंडाळा येथील वाघजाई मंदिरासमोर घडली. बालाजी लक्ष्मण कंठेवाड (वय 47, सध्या रा. मुकुंदवाडी, छत्रपती संभाजीनगर) हे एसटी बस चालवत होते.
बस मार्गावरून पुढे जात असताना एक व्यक्ती रस्त्यात उभी असल्याचे चालकाच्या निदर्शनास आले. त्यामुळे पुढे जाण्यासाठी कंठेवाड यांनी बसचा हॉर्न वाजवला. मात्र, हॉर्न वाजवल्याचा राग आल्याने संबंधित व्यक्तीने बसचालकाशी वाद घातल्याचे पोलिसांकडून सांगण्यात आले आहे.
वाद वाढल्यानंतर चालकाला कथितरित्या मारहाण करण्यात आली. या घटनेमुळे काही काळ परिसरात गोंधळाचे वातावरण निर्माण झाले. त्यानंतर बसचालकाने पोलिसांकडे तक्रार दाखल केली.
या तक्रारीवरून लोणावळा शहर पोलिसांनी रामदास गोविंद घायतिडक (वय 44, रा. आंबेटाकळी पोखर्णी, जि. परभणी) यांच्याविरोधात गुन्हा नोंदवला आहे. या घटनेमागील नेमके कारण, वादाची परिस्थिती आणि मारहाणीबाबतचे इतर तपशील पोलीस तपासत आहेत.
