पुणे : सोमेश्वर सहकारी साखर कारखान्याच्या निवडणुकीच्या रणांगणात ‘अजितदादां’च्या नाव आणि फोटो वापरावरून पेटलेला वाद आता अधिक तीव्र झाला आहे. निवडणूक निर्णय अधिकाऱ्यांनी अजित पवार यांच्या प्रतिमेच्या वापरावर बंदी घालण्याचा निर्णय घेतला होता. मात्र, या निर्णयाविरुद्ध ‘सोमेश्वर विकास पॅनेल’चे प्रमुख पुरुषोत्तम जगताप यांनी आक्रमक पवित्र घेतला असून, निवडणूक अधिकाऱ्यांच्या या भूमिकेला थेट आव्हान दिले आहे.
पुरुषोत्तम जगताप यांनी निवडणूक अधिकाऱ्यांना लेखी पत्र पाठवून आपल्या निर्णयाचा फेरविचार करण्याची आग्रही मागणी केली आहे. आपल्या पत्रात त्यांनी महाराष्ट्र सरकारच्या 15 जुलै 2026 च्या शासन निर्णयाचा स्पष्ट दाखला दिला आहे. या परिपत्रकानुसार, राज्य शासनाने अजित अनंतराव पवार यांचा समावेश ‘राष्ट्रपुरुष व थोर व्यक्तींच्या’ अधिकृत यादीत केला आहे. त्यामुळे अशा सर्वमान्य लोकनेत्याचा फोटो प्रचार साहित्यावर वापरणे कायदेशीर आणि नैतिकदृष्ट्या पूर्णपणे योग्य असल्याचा युक्तिवाद त्यांनी केला आहे.
या भूमिकेचे समर्थन करताना त्यांनी राज्यातील जुन्या राजकीय वादाचा दाखला दिला. शिवसेनेतील फुटीनंतर एकनाथ शिंदे यांच्याकडून बाळासाहेब ठाकरेंचे फोटो वापरण्यावर उद्धव ठाकरे यांनी आक्षेप घेतला होता, तो टिकू शकला नव्हता. थोर पुरुष किंवा लोकनेते हे कोणा एका कुटुंबाची किंवा पक्षाची वैयक्तिक मालमत्ता नसून ते संपूर्ण समाजाचे असतात, असा तर्क जगताप यांनी मांडला आहे.
सहकारी कारखान्यांच्या निवडणुका या पक्षाच्या चिन्हावर लढवल्या जात नाहीत. त्यामुळे कोणत्या कायद्याचा किंवा कलमाचा आधार घेऊन ही बंदी लादली गेली, याचे कायदेशीर स्पष्टीकरण प्रशासनाने द्यावे, असा प्रश्नही त्यांनी उपस्थित केला आहे.
अजित पवार यांचे पुत्र जय पवार यांच्या तक्रारीनंतर निवडणूक प्रशासनाने ही बंदी घातली होती. मात्र, आता पुरुषोत्तम जगताप यांनी थेट शासन निर्णयाचा पुरावा समोर ठेवल्याने निवडणूक अधिकारी काय निर्णय घेतात, याकडे बारामतीसह संपूर्ण सोमेश्वर परिसराचे लक्ष लागले आहे.
