मुंबई : मुंबईतील वडाळा परिसरातील एका जमिनीबाबत ‘ना हरकत प्रमाणपत्र’ देण्यासाठी 1 कोटी रुपयांची लाच मागितल्याप्रकरणी केंद्रीय अन्वेषण विभागाने धडक कारवाई केली आहे. या लाचखोरीप्रकरणी केंद्रीय सार्वजनिक बांधकाम विभागाच्या एका कार्यकारी अभियंत्यासह एकूण 5 जणांना ताब्यात घेण्यात आले आहे.
वडाळ्यातील एका विशिष्ट जमिनीवर बांधकाम करण्यासाठी ती जागा सीपीडब्ल्यूडीच्या अखत्यारीत येत नसल्याचे प्रमाणपत्र मिळवणे आवश्यक होते. हे ‘एनओसी’ देण्यासाठी संबंधित कार्यकारी अभियंत्याने सुरुवातीला 1 कोटी रुपयांची मागणी केली होती. मात्र, नंतर झालेल्या तडजोडीत 70 लाख रुपये देण्याचे निश्चित झाले. ठरलेल्या रकमेपैकी 50 लाख रुपयांचा पहिला हप्ता स्वीकारताना सीबीआयने कार्यकारी अभियंत्याच्या नातेवाईकाला रंगेहाथ पकडले. यानंतर पथकाने लगेचच सूत्रे हलवून नवी मुंबईतील वाशी येथून मुख्य आरोपी कार्यकारी अभियंत्याला अटक केली.
या प्रकरणात केवळ लाच मागणारे अधिकारीच नव्हे, तर लाच देण्याचा प्रयत्न करणाऱ्या एका नामांकित रिअल इस्टेट ग्रुपचे उपाध्यक्ष, व्यवस्थापक आणि फर्मचे पार्टनर यांनाही सीबीआयने बेड्या ठोकल्या आहेत.कारवाईदरम्यान लाचेची 50 लाख रुपयांची रोकड जप्त करण्यात आली. याशिवाय आरोपींच्या मुंबई, नवी मुंबई आणि पुणे येथील ठिकाणांवर टाकलेल्या छाप्यात अतिरिक्त 53.78 लाख रुपयांची रोख रक्कम हस्तगत करण्यात आली आहे.
तपासादरम्यान एक गंभीर बाब उघडकीस आली आहे. या जमिनीबाबत ‘एनओसी’ देताना शासकीय दफ्तरातील ‘डिस्पॅच रजिस्टर’मध्ये कोणतीही नोंद करण्यात आली नव्हती. त्यामुळे या प्रकरणामागे एक मोठी साखळी असण्याची शक्यता वर्तवली जात आहे. अटक करण्यात आलेल्या सर्व आरोपींना मुंबईतील विशेष सीबीआय न्यायालयात सादर केले जाणार असून, सीबीआय या घोटाळ्याचा पुढील तपास करत आहे.
