सातारा: सातारा आणि सांगली जिल्ह्याच्या सीमेवरील सोनसळ घाटात 32 वर्षीय तरुणाचा मृतदेह आढळल्याने परिसरात खळबळ उडाली होती. या प्रकरणाचा कराड तालुका पोलिसांनी अवघ्या 24 तासांत छडा लावला. धक्कादायक बाब म्हणजे, या तरुणाच्या हत्येप्रकरणी त्याचे आई-वडील आणि सख्ख्या भावाला अटक करण्यात आली आहे.
मृत तरुणाचे नाव धनाजी आदलिंगे असे असून, 20 ऑक्टोबर रोजी सोनसळ घाटात त्याचा मृतदेह सडलेल्या अवस्थेत आढळला होता. घटनेची माहिती मिळताच पोलिसांनी तपास सुरू केला. सुरुवातीला हा अनैसर्गिक मृत्यू असल्याचा संशय व्यक्त करण्यात आला. शवविच्छेदन अहवालात धनाजीच्या डोक्याला गंभीर मार लागल्याचे स्पष्ट झाल्यानंतर पोलिसांनी तपासाला वेग दिला.
पोलिसांनी गोपनीय माहिती आणि इतर पुराव्यांच्या आधारे तपासाची दिशा निश्चित केली. त्यानंतर या प्रकरणात धनाजीच्या कुटुंबातील सदस्यांचा सहभाग असल्याचे समोर आले.
तपासात समोर आलेल्या माहितीनुसार, धनाजीला दारूचे व्यसन होते. तो मद्यपान करून घरी आल्यानंतर कुटुंबीयांशी वाद घालत असल्याचे सांगितले जाते. 15 ऑक्टोबर रोजीही तो दारू पिऊन घरी आला आणि भांडण करू लागला. त्यावेळी झालेल्या वादातून त्याच्या डोक्यावर लाकडी स्टुलने वार करण्यात आल्याचा आरोप आहे. या मारहाणीत त्याचा मृत्यू झाल्याचे तपासात निष्पन्न झाल्याचे पोलिसांनी सांगितले.
यानंतर मृतदेहाची विल्हेवाट लावण्यासाठी तो भाजी वाहून नेणाऱ्या व्हॅनमधून सोनसळ घाटात नेऊन टाकल्याचा आरोप आहे. या प्रकरणी वडील सत्यवान आदलिंगे, आई सुरेखा आदलिंगे आणि भाऊ लक्ष्मण आदलिंगे या तिघांना पोलिसांनी अटक केली आहे. त्यांच्याविरोधात गुन्हा दाखल करण्यात आला असून, या घटनेचा पुढील तपास सुरू आहे.
