पुणे : महाविद्यालयात जाण्यासाठी बसची वाट पाहणाऱ्या विद्यार्थिनींच्या घोळक्याला भरधाव कारने धडक दिल्याची दुर्दैवी घटना खेड तालुक्यातील कुरकुंडी फाटा येथे घडली. या अपघातात आदिती नववाथ राळे या विद्यार्थिनीचा मृत्यू झाला, तर अन्य 5 विद्यार्थिनी गंभीर जखमी झाल्या आहेत. शुक्रवारी सकाळी सुमारे 8 वाजता घडलेल्या या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, कुरकुंडी फाटा येथील बसथांब्यावर 7 ते 8 विद्यार्थिनी महाविद्यालयात जाण्यासाठी बसची वाट पाहत उभ्या होत्या. त्याचवेळी राजगुरुनगरच्या दिशेने येणाऱ्या कारने त्यांना जोरदार धडक दिली. या धडकेमुळे विद्यार्थिनी रस्त्यावर पडल्या आणि घटनास्थळी गोंधळ उडाला.
अपघातानंतर जखमी विद्यार्थिनींना तातडीने राजगुरुनगर येथील खासगी रुग्णालयात नेण्यात आले. डॉक्टरांनी त्यांच्यावर उपचार सुरू केले; मात्र आदिती राळे हिचा उपचारादरम्यान मृत्यू झाला. इतर जखमी विद्यार्थिनींवर उपचार सुरू असल्याची माहिती आहे.
या अपघातात सहभागी असलेल्या कारमधून शिक्षक मतदारसंघाचे उमेदवार सचिन सानप यांचा बूथ प्रतिनिधी पाझर मतदान केंद्राकडे जात असल्याची माहिती समोर आली आहे. मतदान केंद्रावर जाण्याच्या घाईत हा अपघात घडल्याचे सांगितले जात आहे. मात्र, अपघाताची नेमकी कारणे तपासातून स्पष्ट होणे आवश्यक आहे.
घटनेची माहिती मिळताच उत्तर महाळुंगे एमआयडीसी पोलीस ठाण्याचे अधिकारी घटनास्थळी दाखल झाले. अपघातानंतर कारचालक तेथून निघून गेल्याचे वृत्त आहे. दरम्यान, चालक सापडल्याशिवाय मृतदेह ताब्यात घेणार नसल्याची भूमिका त्यांनी घेतल्याने काही काळ परिसरात तणावाचे वातावरण निर्माण झाले. या अपघातामुळे विद्यार्थिनींच्या सुरक्षिततेचा प्रश्न पुन्हा ऐरणीवर आला आहे. पोलिसांकडून या प्रकरणाचा पुढील तपास सुरू आहे.
