शिरूर : शिक्रापूर (ता. शिरूर) येथील स्टेट बँक ऑफ इंडियाच्या शाखेशीर उभ्या असलेल्या क्रेटा गाडीची काच फोडून 10 लाख रुपयांची रोकड लांबवणाऱ्या चोरट्याचा शोध घेण्यात पोलिसांना यश आले आहे. या गुन्ह्याचा छडा लावत शिक्रापूर पोलिसांच्या पथकाने थेट आंध्र प्रदेशातील नेल्लोर जिल्ह्यात धाड टाकून तब्बल 2 लाख 90 हजार रुपयांची रोख रक्कम हस्तगत केली.
या चोरीप्रकरणी अतुल सुभाष जेधे (वय 40, रा. जेधेवस्ती, तळेगाव ढमढेरे) यांनी शिक्रापूर पोलीस ठाण्यात तक्रार नोंदवली होती. घटना 8 सप्टेंबर रोजी दुपारी 1.15 च्या सुमारास घडली होती. जेधे यांनी आपली कार बँकेसमोर उभी केली असताना, अज्ञात चोरट्याने गाडीची काच तोडून आत ठेवलेले 10 लाख रुपये चोरून नेले होते. याप्रकरणी पोलिसांनी भारतीय न्याय संहितेच्या (BNS) कलम 303(2) नुसार गुन्हा दाखल करून तपास सुरू केला होता.
तपासादरम्यान पोलीस पथकाने बँकेच्या आणि परिसरातील अनेक सीसीटीव्ही कॅमेऱ्यांचे फुटेज बारकाईने तपासले. तसेच बातमीदारांकडून मिळालेल्या गुप्त माहितीच्या आधारे संशयिताचा माग काढत पोलिसांनी आंध्र प्रदेशातील बिटरगुंटा परिसर गाठला. स्थानिक पोलिसांच्या सहकार्याने कप्पराल टिप्पा (ता. बिटरगुंटा, जि. नेल्लोर) येथे राहणाऱ्या रमेश बाबू गोडेट्टी या संशयिताच्या घरावर छापा टाकण्यात आला. त्याच्या घरातून 2,90,000 रुपयांची रोकड जप्त करण्यात आली.
पुणे ग्रामीणचे पोलीस अधीक्षक संदिपसिंह गिल, अप्पर पोलीस अधीक्षक शुभम कुमार आणि उपविभागीय पोलीस अधिकारी रविंद्र भोसले यांच्या मार्गदर्शनाखाली पोलीस निरीक्षक चंद्रशेखर यादव यांच्या नेतृत्वाखाली ही धाडसी कारवाई करण्यात आली.
या मोहिमेत पोलीस उपनिरीक्षक उमाकांत कुंजीर, जिनेस कोळी, तुषार भोर, अंकुश कारंडे, अमोल दांडगे, रोहिदास पारखे, शिवाजी चितारे, विश्वंभर वाघमारे, अमोल नलगे, नारायण वाळके, राम जाधव, मच्छींद्र निचीत, नागेश वाघमारे आणि भारत भोसले यांनी महत्त्वाची भूमिका बजावली. या प्रकरणाचा पुढील तपास पोलीस उपनिरीक्षक उमाकांत कुंजीर व पोलीस कॉन्स्टेबल भारत भोसले करत आहेत
