पुणे : बॉलिवूड अभिनेता टायगर श्रॉफवर झालेल्या गोळीबार प्रकरणाला मोठे यश मिळाले आहे. मुंबई गुन्हे शाखेने राजस्थानमधील कोटा येथून तीन संशयितांना ताब्यात घेतले आहे. पुण्याहून जयपूरकडे जाणाऱ्या एका रेल्वेगाडीतून त्यांना पकडण्यात आले, मात्र कोटा पोलिसांनी अजून या अटकेला अधिकृत दुजोरा दिलेला नाही.
तपासात समोर आले की, हल्ल्यानंतर आरोपींनी त्यांची दुचाकी अंधेरी रेल्वे स्थानक परिसरात सोडली आणि तिथून सुरतच्या दिशेने पळ काढला होता. सीसीटीव्ही फुटेजच्या आधारे पोलिसांनी तपास करत ही माहिती मिळवली. अटक केलेल्यांमध्ये फुल्सिंग (वय 17, रा. हरियाणा), रेहान (वय 18, रा. हरियाणा) आणि ऋतिक कुमार उर्फ रोशन (वय 22, रा. बिहार, सध्या अंधेरी पश्चिम येथे रॅपिडो चालक म्हणून कार्यरत) यांचा समावेश आहे.
फॉरेन्सिक अहवालानुसार, या हल्ल्यात गावठी पिस्तुलाचा वापर करण्यात आला होता. हल्लेखोराने एकूण 7 गोळ्या झाडल्या, त्यापैकी 5 गोळ्या कारला लागल्या तर 2 गोळ्यांचा नेम चुकला. सुदैवाने या हल्ल्यात टायगर श्रॉफ थोडक्यात बचावला, पण त्यांच्या चालकाला गंभीर दुखापत झाली आहे. पोलिसांनी दोघांचेही जबाब नोंदवून घेतले आहेत.
दरम्यान, या हल्ल्याची जबाबदारी लॉरेन्स बिश्नोई गँगचा म्होरक्या अनिल पंडित याने घेतली आहे. हरियाणा, दिल्ली आणि पुण्यातील गुन्हेगारी जगतात त्याचे नाव आधीपासूनच चर्चेत आहे. सध्या पोलीस या प्रकरणाचा सखोल तपास करत असून इतर म्होरक्यांचा माग काढत आहेत.
