लोणावळा: लोणावळा शहरातील पूरग्रस्त कुटुंबांना आर्थिक मदत मिळण्याच्या प्रक्रियेला आता गती मिळाली आहे. पुरामुळे घरांचे, दुकानांचे आणि व्यावसायिक मालमत्तांचे नुकसान झालेल्या नागरिकांना शासनाकडून मदत मिळण्याचा मार्ग मोकळा होत असल्याची माहिती लोणावळा नगरपालिकेच्या पदाधिकाऱ्यांनी पत्रकार परिषदेत दिली. त्यामुळे अनेक दिवसांपासून मदतीच्या प्रतीक्षेत असलेल्या कुटुंबांना दिलासा मिळण्याची अपेक्षा आहे.
पूरग्रस्तांना मदत मिळावी यासाठी नगरपालिकेने बाधित भागांचे सर्वेक्षण केले. नुकसान झालेल्या मालमत्तांचे पंचनामे, प्रतिज्ञापत्रे आणि एकत्रित अहवाल तयार करून संबंधित प्रशासकीय यंत्रणेकडे पाठवण्यात आला आहे. या कागदपत्रांमुळे पात्र लाभार्थ्यांना आर्थिक मदत देण्याची पुढील प्रक्रिया सुरू होण्यास मदत झाली आहे.
नगरपालिकेच्या सर्वेक्षणात एकूण 1,983 आपत्तीग्रस्तांची नोंद करण्यात आली आहे. पूरस्थितीमुळे सुमारे 2,000 कुटुंबे आणि व्यापाऱ्यांचे नुकसान झाल्याची माहिती संकलित करण्यात आली आहे. बाधित नागरिकांना आर्थिक आधार मिळावा आणि त्यांची दिवाळी दिलासादायक व्हावी, यासाठी नगरपालिका प्रशासनाकडून सातत्याने पाठपुरावा करण्यात आला.
आमदार सुनील शेळके यांच्या मार्गदर्शनाखाली नगरपालिकेचे पदाधिकारी आणि नगरसेवकांनी संबंधित विभागांकडे मदतीसाठी प्रयत्न केले. शासनाकडून मिळणारी मदत पात्र लाभार्थ्यांच्या सर्वेक्षणादरम्यान नोंदवलेल्या बँक खात्यांमध्ये थेट जमा केली जाणार असल्याचे सांगण्यात आले. मात्र, प्रत्यक्ष पैसे जमा होण्याची तारीख अद्याप स्पष्ट झालेली नाही.
याशिवाय, टाटा कंपनीच्या माध्यमातून उपलब्ध होणारा मदतनिधीही लवकर वितरित व्हावा, यासाठी प्रयत्न सुरू आहेत. दिवाळीपूर्वी मदत मिळाल्यास घरांचे आणि व्यवसायांचे नुकसान झालेल्या नागरिकांना सण साजरा करण्यासाठी आर्थिक आधार मिळू शकतो.
या संदर्भात नगराध्यक्ष राजेंद्र सोनवणे, उपनगराध्यक्ष देविदास कडू, स्वच्छता व आरोग्य समितीचे सभापती धनंजय काळोखे, तसेच नगरसेवक सनी घोणे, स्वप्ना कदम, मुकेश परमार आणि निखिल कविश्वर यांनी पत्रकार परिषदेत माहिती दिली.
