सोलापूर: सोलापूर जिल्ह्यातील अकलूज येथे (Solapur News) आरोग्य विभागातील गंभीर निष्काळजीपणाचा प्रकार समोर आला आहे. शासकीय आयसीटीसी केंद्रातून एका (Akluj News) गर्भवती महिलेला चुकीचा एचआयव्ही पॉझिटिव्ह अहवाल देण्यात आल्याचा आरोप करण्यात आला आहे. या चुकीच्या अहवालामुळे तिच्या आयुष्यात मोठा गोंधळ निर्माण झाला. (Latest Marathi News)
16 ऑगस्ट 2024 रोजी या महिलेला आयसीटीसी केंद्रात तपासणीदरम्यान एचआयव्ही पॉझिटिव्ह असल्याचे सांगण्यात आले. या अहवालानंतर तिच्या पती आणि सासरच्या लोकांनी तिच्यावर संशय घेत तिला घराबाहेर काढल्याचे समोर आले आहे.
मात्र, त्यानंतर तिने विविध शासकीय आणि खासगी रुग्णालयांमध्ये पुन्हा तपासण्या केल्या. सोलापूर जिल्हा रुग्णालय (SDH), इतर आयसीटीसी केंद्रे आणि हिंदलॅब्स येथे करण्यात आलेल्या HIV-PCR आणि Viral Load चाचण्यांमध्ये ती पूर्णपणे निगेटिव्ह असल्याचे स्पष्ट झाले. “RNA Not Detected” असा निष्कर्ष या तपासण्यांमध्ये नोंदवण्यात आला.
चुकीच्या अहवालामुळे महिलेवर अनावश्यक औषधोपचार सुरू करण्यात आले होते. यामुळे तिच्या आरोग्यावरही परिणाम झाल्याची तक्रार करण्यात आली आहे.
या प्रकरणाची गंभीर दखल घेत जिल्हा शल्यचिकित्सक डॉ. वर्षा डोईफोडे यांनी तीन सदस्यीय समिती स्थापन केली आहे. या समितीला संपूर्ण प्रकरणाचा अहवाल आठ दिवसांत सादर करण्याचे आदेश देण्यात आले आहेत. अहवालानंतर दोषींवर कारवाई केली जाईल, असे प्रशासनाकडून सांगण्यात आले आहे.
दरम्यान, या प्रकरणात संबंधितांवर कठोर कारवाई करावी, तसेच पीडित महिलेला न्याय आणि नुकसानभरपाई द्यावी, अशी मागणी होत आहे. यासाठी 1 मे रोजी मुख्यमंत्री कार्यालयासमोर आंदोलन करण्याचा इशाराही देण्यात आला आहे.
