Pune Police Bribe News पुणे, ता. ६ : गुटख्याच्या मालावर कारवाई न करण्यासाठी तब्बल ४ लाख रुपयांची लाच स्वीकारल्याप्रकरणी खडक पोलीस ठाण्यातील दोन पोलिस अंमलदारांवर शिस्तभंगाची कारवाई करण्यात आली आहे. या प्रकरणामुळे पोलीस दलाच्या प्रतिमेला तडा गेला असून नागरिकांमध्ये संताप व्यक्त होत आहे. Pune Police Bribe News
आशिष आदिनाथ चव्हाण आणि इरफान इमजुद्दीन नदाफ अशी कारवाई करण्यात आलेल्या पोलिसांची नावे असून, ते दोघेही त्या वेळी खडक पोलीस ठाण्यात कार्यरत होते. नोव्हेंबर २०२५ मध्ये हा प्रकार उघडकीस आला होता. गुटख्याचा माल पकडल्यानंतर त्यावर कारवाई टाळण्यासाठी संबंधितांकडून ४ लाख रुपये उकळल्याचा आरोप त्यांच्यावर सिद्ध झाला आहे.
मिळालेल्या माहितीनुसार, २२ नोव्हेंबर २०२५ रोजी या दोघांनी लोहियानगर येथून गुटख्याच्या मालाने भरलेली गाडीचा पाठलाग करत कोरेगाव पार्क परिसरात ती अडवली. त्यानंतर संबंधित व्यापाऱ्यांना कॅम्प परिसरातील त्रिकोणी गार्डन येथे नेऊन त्यांच्याकडून बेकायदेशीररित्या ४ लाख रुपये उकळण्यात आले.
विशेष म्हणजे, या प्रकरणात कारवाई होऊ नये म्हणून तक्रारदारांवर दबाव आणण्याचा प्रयत्न झाल्याचेही चौकशीत समोर आले आहे. गनिमी कावा संघटनेच्या माध्यमातून तक्रार मागे घेण्यासाठी तसेच आधी दिलेले जबाब बदलण्यासाठी दबाव टाकण्यात आल्याचा गंभीर आरोप आहे. तक्रारदारांनी शपथपत्रावर पूर्वीचा जबाब फिरविल्याचेही चौकशीत उघड झाले आहे. फरासखाना विभागाच्या सहाय्यक पोलिस आयुक्तांनी केलेल्या चौकशीत या दोन्ही पोलिसांनी कर्तव्यात गंभीर कसूर केल्याचे स्पष्ट झाले. सीसीटीव्हीच्या कक्षेबाहेर राहून कारवाई केल्याचेही निदर्शनास आले आहे.
या प्रकरणाची गांभीर्याने दखल घेत पोलीस उपायुक्त ऋषिकेश रावले यांनी आशिष चव्हाण व इरफान नदाफ यांना शिक्षा सुनावली आहे. त्यानुसार त्यांच्या पुढील दोन वर्षांच्या वार्षिक वेतनवाढीवर परिणाम न होईल अशा पद्धतीने ती रोखण्यात आली आहे. या घटनेमुळे पोलीस दलातील पारदर्शकतेवर प्रश्नचिन्ह निर्माण झाले असून, अशा प्रकारांवर कठोर कारवाईची गरज असल्याची भावना नागरिकांकडून व्यक्त होत आहे.
