Leopard News आंबेगाव, ता. ६ : रानमळा (ता. आंबेगाव) परिसरात मंगळवारी (ता.५) सायंकाळी घडलेल्या बिबट्याच्या हल्ल्याने परिसरात खळबळ उडाली आहे. रस्त्यावरून दुचाकीने प्रवास करणाऱ्या तरुणावर बिबट्याने अचानक झडप घालत हल्ला केल्याने तो जखमी झाला असून नागरिकांमध्ये भीतीचे वातावरण निर्माण झाले आहे. Leopard News
प्रशांत अरूण रोकडे (वय ३४, रा. लोणी, ता. आंबेगाव) असे जखमी तरुणाचे नाव आहे. मिळालेल्या माहितीनुसार, प्रशांत रोकडे आणि त्यांचा भाऊ अक्षय रोकडे हे दोघे मंगळवारी सायंकाळी साडेसातच्या सुमारास लोणी येथून वडगावपीर परिसरातील पोखरकर मळा येथे कामासाठी दुचाकीने जात होते. Leopard News
रानमळा गावाच्या हद्दीत भामची विहीर परिसरात पोहोचताच रस्त्याच्या कडेला दबा धरून बसलेल्या बिबट्याने अचानक मोटारसायकलवर मागे बसलेल्या प्रशांत रोकडे यांच्यावर झेप घेतली. या हल्ल्यात त्यांच्या डाव्या पायाला गंभीर दुखापत झाली.
घटनेनंतर स्थानिक ग्रामस्थ आणि वनविभागाच्या कर्मचाऱ्यांनी तत्काळ मदत करत जखमीला मंचर उपजिल्हा रुग्णालयात दाखल केले. सध्या त्यांची प्रकृती स्थिर असून प्राथमिक उपचारानंतर त्यांना घरी सोडण्यात आले आहे. Leopard News
दरम्यान, या घटनेनंतर वनविभाग सतर्क झाला असून बिबट्याचा बंदोबस्त करण्यासाठी हल्ल्याच्या ठिकाणी पिंजरा लावण्यात आला आहे. मंचर विभागाचे वनपरिक्षेत्र अधिकारी विकास भोसले यांनी याबाबत माहिती दिली. या प्रकारामुळे परिसरातील नागरिकांमध्ये भीतीचे वातावरण पसरले असून, रात्रीच्या वेळी सावधगिरी बाळगण्याचे आवाहन प्रशासनाकडून करण्यात आले आहे.
