Bhimashankar Temple पुणे : श्री क्षेत्र भीमाशंकर मंदिर ३१ मेपासून भाविकांसाठी पुन्हा खुले होणार असून, पुनर्बांधणी व विविध विकासकामे अंतिम टप्प्यात पोहोचली आहेत. यामुळे भाविकांना अधिक सुलभ, सुरक्षित आणि नियोजित दर्शनाची सुविधा उपलब्ध होणार असल्याची माहिती जिल्हाधिकारी जितेंद्र डुडी यांनी दिली. Bhimashankar Temple
राज्य शासनाने १२ ज्योतिर्लिंगांपैकी एक असलेल्या भीमाशंकर मंदिराच्या सर्वांगीण विकासासाठी विशेष आराखड्यास मंजुरी दिल्यानंतर ९ जानेवारीपासून मंदिर बंद ठेवण्यात आले होते. या काळात तीर्थक्षेत्र विकास योजनेअंतर्गत मंदिर परिसरातील गर्दी नियंत्रण, सुरक्षा आणि सुविधा वाढविण्याची कामे हाती घेण्यात आली.
या विकासकामांमध्ये भव्य नवीन सभामंडप उभारणे, जुन्या सभामंडपाचे विसर्जन, पायऱ्यांचा मार्ग, प्रवेश व निर्गमन मार्गांची सुधारणा, दर्शन मार्गिका, गर्दी नियंत्रण व्यवस्था तसेच भाविकांसाठी विश्रांती क्षेत्रांची उभारणी यांचा समावेश आहे. पारंपरिक तंत्रज्ञानाचा वापर करून ही कामे वेगाने पूर्ण करण्यात आली असून सुमारे ९० टक्के काम पूर्ण झाल्याचे प्रशासनाने स्पष्ट केले.
दरम्यान, २०२७ मध्ये नाशिक येथे होणाऱ्या सिंहस्थ कुंभमेळ्याच्या पार्श्वभूमीवर भाविकांची वाढती संख्या लक्षात घेऊन अधिक सक्षम आणि सुटसुटीत व्यवस्था उभारण्याचा प्रशासनाचा उद्देश असल्याचे सांगण्यात आले आहे.
