लोणी काळभोर, ता. २७ : “मंदिरातील पैसे उचलून नेऊ नको,” एवढे सांगितल्याचा राग मनात धरून एका तरुणाने थेट मंदिरातील पुजाऱ्यावर काठीने हल्ला करत त्याचा दात तोडल्याची धक्कादायक घटना मांजरी बुद्रुक परिसरात घडली आहे. इतकेच नव्हे तर “पोलीसांत तक्रार दिलीस तर महिलांच्या खोट्या गुन्ह्यात अडकवेन,” अशी धमकीही आरोपीने दिल्याचा आरोप करण्यात आला आहे. या घटनेमुळे परिसरात मोठी खळबळ उडाली असून, धार्मिक स्थळात घडलेल्या या प्रकारामुळे नागरिकांमध्ये संताप व्यक्त केला जात आहे.
याप्रकरणी चरण सोनवणे याच्याविरोधात मांजरी पोलीस ठाण्यात गुन्हा दाखल करण्यात आला आहे. शुभम वसंतराव दीक्षित (वय २६, रा. मांजरी बुद्रुक) यांनी याबाबत तक्रार दिली आहे. पोलिसांनी दिलेल्या माहितीनुसार, शुभम दीक्षित हे गेल्या एका वर्षापासून मांजरी बुद्रुक येथील मारुती मंदिरात पुजारी म्हणून कार्यरत आहेत. १९ मे रोजी दुपारी बारा वाजण्याच्या सुमारास चरण सोनवणे हा मंदिरात आला होता. त्यावेळी मंदिरातील ताटात ठेवलेले पैसे तो उचलताना पुजाऱ्याच्या निदर्शनास आले. “अरे, मंदिरातील पैसे उचलून घेऊन जाऊ नको,” असे शुभम यांनी सांगितल्याने आरोपी संतापला.
रागाच्या भरात चरण सोनवणे हा समोरील आपल्या फर्निचर दुकानात गेला आणि तेथून काठी आणून पुजाऱ्यावर हल्ला चढवला. त्याने शुभम दीक्षित यांच्या डाव्या हातावर आणि तोंडावर जोरदार मारहाण केली. या हल्ल्यात त्यांचा समोरील अर्धा दात तुटला असून ओठालाही गंभीर दुखापत झाली. जखमी अवस्थेत त्यांनी उपचारासाठी पृथ्वीक क्लिनिकमध्ये धाव घेतली. डॉक्टरांनी त्यांच्या ओठाला टाके घालत उपचार केले.
दरम्यान, “पोलीसांत तक्रार दिलीस तर महिलांच्या खोट्या गुन्ह्यात अडकवेन,” अशी धमकी आरोपीने दिल्याने पुजारी सुरुवातीला तक्रार देण्यासाठी पुढे आले नाहीत. मात्र आई-वडिलांशी चर्चा केल्यानंतर त्यांनी अखेर २६ मे रोजी मांजरी पोलीस ठाण्यात धाव घेत तक्रार दाखल केली. या प्रकरणाचा पुढील तपास पोलीस उपनिरीक्षक हनुमंत तरटे करीत आहेत.
